Uns het Böses gschwaant letscht Joor
Die Gfoore sind laider immer no woor
Jetz hämmer s Mittel identifiziert
Wo das Yybel wirggsam kuriert:
Demokratie noch Schwyzer Aart
Mit Yybezug vo dr Basis paart!
Demokratisch gseen sich vyyli Länder
Und setze dr Volggsmacht ängi Gländer.
D Lüt dörfe nur all Schaltjoor wääle,
Referändum und Initiative fääle.
Demokratie haisst Volggsherrschaft,
Si entfaltet iiri Zauberkraft
Nur wenn si d Bürger yybeziet
Ständig und uff jedem Gebiet.
Ischs Volgg dr ächti Souverään,
durkrüzts mitunder Politiggerplään.
E Vorlaag ka so voll abschiffe
Und denn döönts «die hänns halt nid begriffe»!
Aber wär d Macht vom Volgg nid akzeptiert
Het sich als Volggsverträtter disqualifiziert.
Zwaar kas scho mängisch närvig syy:
Kuum leggsch di Abstimm-Couvert yy
Scho liggt e neus im Briefkaschte inne
Und wiider muesch di hintersinne
Di informiere, s Biechli lääse,
Di ummeschloo mittem woore Wääse
Vo dääre neuschte Initiative.
Dr Titel isch zmaischt kai Indikative
Was do neu greeglet wärde soll.
So nimmt me s Stimmvolgg nid für voll!
E super Spruch, ganz in dym Sinn,
Und denn ischs puure Gägedail drin.
Parole sind no lengscht nid woor
Und Wärbeteggschter e grossi Gfoor
Wo schmissigi Slogans dien kreiere
Und d Bürger so in d Irri fiere.
Do informiersch di, luegsch d Arena aa
Und bisch drnoo nid schlauer draa.
Zletscht han ychs ändlig halbwäggs erfasst
Und mergg, dass weder JO no NAI ganz basst.
Jetzt könnt y mi dr Stimm enthalte
Leer yyleege oder grad s Couvert bhalte.
Y will aber e guete Bürger syy
My Votum muess drum in d Urne dryy.
Nur hani no kai Entschaidig droffe,
s Renne isch no völlig offe.
Strategischs Dängge isch nid gfrogt
Y ha mi so scho böös verzoggt
Im Glaube an d Chanceloosigkait
My Stimm gää dir vermaintlige Minderhait.
So hän Vorlaage an dr Urne butzt
Und mi zrugg gloo entsetzt, verdutzt.
Es isch sone Sach mit de Prognose
Au bi de Profis göön die oft in d Hoose.
S Stimmrächt isch nid nur Rächt, au Pflicht
Mi Entschaidig wirggt uff lengeri Sicht.
Me darf nid nur s aigene Gärtli pflääge
Muess Vor- und Noochdail guet abwääge
Und immer fescht ans Gemeinwool dängge,
unsere Staat in gueti Baane längge.
Wirsch dääre grosse Verantwortig grächt
Goots unserer Gsellschaft gwiss nid schlächt
E jeede darf unseri Wält mitgschtalte
So gits kai Despote, wo willkürlig walte
Mir alli hän d Kontrolle in dr Hand
Und entschaide über uns mitenand
Muesch nid über die do Oobe klaage
Denn bi uns hän mir Bürger s Saage!
Drum mergg dr die ganz simpli Wyysig:
Stimm ab oder suscht hyyl lyyslig.