In d Infraschtruggtur muesch inveschtiere
Suscht könnti schreggligs lyycht passiere.
An vyyle Ort uff däre Wält
Het me drfüür nur nid gnueg Gäld.
In Basel sin d Finanze umme
Das isch mängisch eender s Dumme.
By uns wird ständig renoviert
Bis dr Verkeer ganz kollabiert.
Die letschte Joor hän ys scho gleert
Egal wies machsch, es isch verkeert
Zem in dr Ryybrugg Riebli z hoole
Wird jedem s Drämmli stargg empfoole
Aber statt em Drämmli kunnt e Bus
Wo stegge blybt im zääche Fluss
Vo dr dagdääglige Bläächlawine
Uff jeedere Stroos in d Innestadt yyne.
S Velo hänns mer kürzlig gmuggt
Y bi allewyyl no ganz verruggt
E Miet-Trotti wäär jetzt vylicht d Hilf
Nur stöön die alli grad voll im Schilf
Wo se die Letschte hän lo stoo
So Deppe sotti me verschloo.
Zem Laufe isch s mir e bitz z wyt
Das schafft y sicher nid zer Zyt.
E Strooss wird für Möönet voll blockiert!
D Plaaner hänns immer no nid kapiert.
Jä, s isch wirgglig e Misere
Wenn d wotsch in Basel no verkeere.
Ob all de misslige Schiggaane
Dängg y an bambelndi Liane
An dene könntsch übers Chaos schwinge
Und erscht am Zyyl schnäll abespringe.
An Dschungel gmaane aim au d Drämmli
Mit iire Kullerauge nämmli
D BVB wott so Faarer finde,
Dr Personalschwund überwinde.
So groosi Auge hän au vyyli Tier
Im Urwald gwiss nid nur zer Zier:
Im dichte Gstrüpp, ganz heiss und fiecht,
gseet me nur schlächt wägem wenige Liecht.
No mee Dschungel-Analogie
Fallt mir jetzt grad au no yy:
De kunnsch dr als Indiana Jones vor
Erreichsch vo dr Braiti uss s Spaaledoor!
I wott jo niemerts im Baudep grängge
Nur muess y an Fitzcarraldo dängge.
Do findsch ächt numme no Glassehait
Mit em Balu sinere Gmietligkait!
Wotsch aggtivi Fasnachtsfreud aapeile,
Am Cortège so Zeedel wie dää verdaile
Im Taggt vo Märsch di Goschdym zaige
Di wirbelnd übers Kalbfäll naige
Wotsch gar em Piccoloschpiil fromme
Bi de Junge Glunggi bisch willkomme.
Mir schlängle ys Joor für Joor durs Gwiel
Egal ob fiecht-haiss oder kiel!