D ART isch fir die Szeene e tolli Sach
Die ganz Kunschtwält drifft sich unter aim Dach
Mit däm Handel wäggsle Millioone d Däsche
Eso wird s Gäld im Stille «suuber» gwäsche

Wenn mir nid Oeri oder Hoffmann haisse
Sinn mir an dr Sytelinie bim yynegnaisse
Zem sich in däre fremde Wält lo tryybe
Nur, wenn wottsch dä happig Yydritt ryybe

Dr Schygg mache d Hotel und au Baize
Das duet mi emänd zur Wyssgluet raize
D Bryyse stiige und alli Baize sinn voll
Au d Drämmli und Strosse, s isch nid toll

Zem Gligg isch nur e Wuche die Komeedi
Kinschtler und Kunscht, drvo e Huffe schreegi
Gseesch an dr ART, muesch mänggmol lache
In de Kinderzimmer gits jo au so Sache

Kunscht seesch nid nur in de Mässehalle
S Volgg uff dr Strooss will allne gfalle
Und zaigt sich farbig und äxtravagant
Als Ego-Kunscht-Ikoone, ganz «elegant»

S isch halt e sone Sach mit däre Kunscht
Vyl Gäld drfir bikunnsch nid ummesunscht
Was d Lyynwand zaigt, isch nid an erschter Stell
Wie dä Saich verkaufsch, das isch essenziell

Kinschtler schryybe hoorigi Analyyse
Begründe so die saumässige Bryyse
Dä Handel isch «kinschtlig» massloos
Au d Mafia mischlet mit, ganz gross

D Mäss goot scho lang in die falschi Richtig
Die alti Muschtermäss wär ys doch wichtig
Aber nai, au d Uhremäss losst me untergoo
Drfir wird d ART exportiert, wär ka s verstoo

Dr Aafang vom Änd isch d Fusioon mit Ziiri gsy
Y ha dänggt, ussgrächnet Ziiri, das ka nid sy
S «Basel» im Namme duet gly verschwinde
In Basel kasch kaini grosse Mässe me finde

Wirsch gsee, dr ART-Umbau stoot ys bevor
Dä Mäss-Export isch e grossi Gfoor
D ART Miami hett zaigt, wo s aanegoot
Irgendwenn ischs denn aifach z spoot

D ART isch denn au no uff Hong-Kong koo
Kain hett gmotzt, das kan y nid verstoo
Bi däm Yyfluss vo China muesch di frooge
Dä Profitgier isch doch aifach verlooge

Und jetz au no Qatar, dasch dr greeschti Saich
Do zellt d Scharia, nid s Rächt, dasch biirewaich
D Menscherächt duet d Mäss aifach ibergoo
Si hänn em Infantino syni Arbetswys ibernoo

Swissair oder CS, die Schämmer dien sich glyyche
Goots so wyter, isch d Mäss Basel au bald e Lyyche
Trotz em grosse Aadail wird s Volgg do prellt
Nur dr Kommerz und Profit, das isch was zellt

Ob Qatar, Hong-Kong oder Basel, s isch iberall glych
D Mäss, d Regierig, jeede vertaidigt numme sy Ryych
Dr Mammon regiert und Kunscht isch nur dr Schrott
Mir saage däm nur: dasch dr moralisch Banggrott!