Glunggi-Logo

Zeedel Stamm 2018

Fasnacht 2018

Glunggi Logo

Fasnachtsclique Glunggi 1966

Sujet:

Neys Karma
In-dr Pharma

Mir hälfe de Grangge, um jeede Brys

Mensche kemme zu uns, uus dr ganze Wält.
E paar vo ihne verdiene au horänd vyl Gäld.
Es schaffe e huffe Gscheiti in dr Pharma
und erinnere uns an Werter, wie zum Byspyl s’Karma.

Alli unseri Gedangge und Handlige
fiere zu Erfolg, Fruscht oder Wandlige.
In de indische Religione wird s’Karma glehrt
und mit em Lääbenskreislauf zämme verehrt.

Es isch e Wyshait wo mir lang scho dien kenne,
aber laider kai so Wort drfir kenne nenne.
Am entschte isch‘s emänd no d„Nochhaltigkait“,
bi unsere Politigger wartsch do druff - scho ne Eewigkait.

Sy dängge z’erscht für sich, oder an ihr Hobby,
z‘letscht fir d’Schwyz, denn vorhär kunnt ihry Lobby.
Au mit dr Wirtschaft zämme schaffe dien si sich schwer,
es wärde Firme ins Usland verkauft, mir beduure‘s sehr.

Das haisst si dien für andery e negativs Karma verehre,
e Resuldat isch unseri dagdägligy Verkehrs-Mysère.
E sone Byspyl isch au d‘Granggekasse, wo mir Byträg zahle,
drfir dien sich däne ihry Chefe in dr Sunne aale.

Unseri Pharma bruucht neiy Strategye,
holt sich drzue Kepf mit guete Idee.
E Inder set die Gschigg vo dr Novartis jetzte laite,
hoffendlig fierts nid zu Entlassige, oder enere Plaite.

Vergässe isch dä Padänt-Strytt mit Indie nämmlig nit,
wo‘s weenig Rächt, au fir Fraue, zum sich wehre git.
D’Umwält und Mensche wärde bim Schaffe nit gschoont,
Millione mien schuffte und luege bim Lohn in Moond.

Know how wird aifach ohni Entschädigung ibernoo,
fir dr Forschigsuffwand wirtsch vo däne nyt bikoo.
S‘wird deert kopiert und billygscht produziert,
denn als Generika „Make in India“ exportiert.

Dr Jo Jimenez sait, är mag nimme strytte
und will uff däm Novartis-Ross nid wyter rytte.
E grosse Forschigsuffwand und billygy Medikamänt,
das passt nid zämme, au wenn’s Volk zwängt.

Dr Vasant Narasimhan isch uuserwählt.
Är stüürt jetzt das Boot, für d’Börsewält.
Mir sin doch gspannt was däm sy Karma bringt,
ob e Novartis-Aktie stygt, oder ob si singgt.

Wärde Jobs uff Indie transveriert,
oder in Basel neiy Stelle generiert?
Gits au bi uns kaini feschte Arbetsverträg meh?
Het mes mit korräggte Wachstumszahle gseh?

Wärde d’Laborratte in Indie züchtet und seziert;
d’Versuechs-Kinggel neu in Dehli stationiert?
Unseri Vorgoobe bi Tierversiech werde eso umgange,
trotz de heilige Kieh, s’isch e megligs Unterfange.

Wärde Stire wie in Indie, nimme richtig zahlt?
Wird dr Gräbs besigt, jeedi Art?
Git’s e Dänggmool, hecher als das vo ääne am Rhy?
Architeggte uus dr ganze Wält sin sicher drby.

Wärde mit dr Griegskasse Konkurränte gfrässe
und derfir die resistänte Baggterie vergässe?
Git‘s bald e Dablette für e steryle Maage,
für d’Maade, wo de kauft hesch, im Laade?

Goot d’Forschig wyter bi Geenmanipulatione?
Fiert Nuklearmedizin zu weniger Komplikatione?
D‘ Atomtechnik isch fir e huffe nit praktikabel,
die neyschti Version isch doch aber akzeptabel.

Äär kennt jo au besseri Bezieyge zu däm Indie uffnäh
und däne die neyschde Umwälttechnigge gää.
Är kennt au Medikamänt in Indie verhindere,
wo me illegal Schwangerschafte duet behindere.

E Therapy für 1300 Millione Lyt, das isch e Märt!
Laider hän die meischte Inder derfir kai Geegewärt.
Wärde bi uns d‘ Medikament drfir unerschwinglig?
Es isch is doch wäge de Prämie scho schwindlig!

E Pille fir e lengers Läbe käm no in Froog,
wäge dr Bevölkerigszuenahm wär’s aber eher e Bloog.
Duet me Meedi an Obdachlose usbrobiere,
oder de humane Religione ebbis spendiere?

D‘ Politigger intressiere die Theme nit,
solangs für dr Staat gnueg Gäld git.
D‘Pharma isch in dr Schwyz die heiligy Kueh,
drum ka sy e huffe realisiere, me lost si in Rueh.

D’Granggekasseprämie dien weh.
Dr Mittelstand trifft’s immer meh.
D‘Frau Dreifuess duet das gniesse,
und uus frienere Zyte griesse.

Wäge ihre sin die Prämie nit im Dürigs-Dopf.
Mir fordere e Korreggtuur vo däm alte Zopf.
Denn s‘nägschte Debaggel kunnt scho uff uns zue,
bald hämmer kai Strom me, und d’Pharma got zue.

Drum dien au mir unser Hirny drimme
und uff indische Götter y‘stimme.
Vylmool lauft Macht und Gäld iber Religione.
Gedangge doo driber dien sich loone.

Mir finde’s guet, wenn d‘Chefe nit nur „nämme“,
bi uns hängge Inovatione mit dr Fasnacht zämme.
Vasant, syg e grade Maa,
s’Gäld griegsch uus Basel, dängg do draa!

D‘Ladärne-Uusstellig uff em Minschterplatz und d‘Waage- und Reggwisyte-Uusstellig bi dr Kasärne sinn vom Mäntig z‘Nacht bis am Mittwuch demorge!

Dr Glunggi-Käller isch an dr Bäumligass 7 (Yygang Bluemelaade).

Maitli und Buebe ab 7 Joohr, wo wänn lehre drummle oder pfyffe, kenne sich im Käller am Samschtig, 24. Hornig vom elfi bis am zwai yyschrybe.
S’Iebigslokal isch im Schuelhuus St. Alban, Engelgass 40 z'Basel.
Am Frytig, 23. Hornig vom ains bis am fünfi und am Samschtig, 24. Hornig vom elfi bis halb fünfi findet me ys au an unserem Stand im Zält vo dr erschte Lektion uff em Barfi.

Usskunft gänn d‘Obfraue Sandra Meier & Melanie Lacalamita
Mail: obfrau-jg@glunggi.ch
De findsch uns au im Netz: www.glunggi.ch