Glunggi-Logo

Zeedel Stamm 2017

Fasnacht 2017

Glunggi Logo

Fasnachtsclique Glunggi 1966

Sujet:

PRIMA-T-RUMP
Mach Amerika nonemool zem Aff!

Amerika, Amerika, das Druurspiil heisst Amerika.
Es isch e Drama in däm Schauspiilhuus
und s’kunnt bim Draibuech kaine druus.
Emänd isch’s nit nur aifach druurig,
nai – me beduurt dä Zuestand schuurig.
Das Drama isch efang im erschte Aggt,
jetzt kunnt dr Räscht im Stundetaggt,
und was no uusekunnt – me waiss es nit,
was das äggscht fir e Zuekunft git.

Das Wahlgschäft deert,
isch halt scho e bitzli gschteert.
Wär duet und ka denn wirgglig wähle?
Und die wo wähle – dien sich vergääbe quäle.
Doch nonem gnaue nooche zelle,
mergt me – hett me dä äggscht gar nit welle?
Eb Maa eb Frau – en ärnschti Froog,
das isch die national-sexuelli Ploog.

Im Wahlkampf hett me d’Wortwahl gheert,
wie me sich mit alle Mittel wehrt.
Doch welli Strategy hett wirgglig gnitzt,
und wär hett do am maischte Drägg verspritzt?
S’Wahlgschäft isch dert ääne schytter,
doch d’Ärde drait sich trotzdäm wytter.

Do hett e mängg’s nit gschtumme,
nur wär sin do am Schluss die Dumme?
S’hett e huffe druurig’s draa,
drum nennt me’s – immer no Amerika.
Die Kultur dert äähne,
die isch landeswyt zem gäähne.
Zellt denn hit uff däre Wält,
numme no das liebi Gäld?
Do isch sicher ebbis draa,
Quo vadis – lieb’s Amerika.
Die allgemein Verblöödig – kunnt halt als wie meh
und Dummhait duet schynt’s gar nit weh.

D’Präsidäntschafts-Wahle sin zwor umme,
doch hett äggscht wirgglig alles gschtumme?
Dr Gheimdienst duet in jedem Fächli sueche,
bim FBI – dert ghert me’s nur no flueche.
Doch d’Russe – die dien sicher ebbis finde,
vom Trump – so glaini Jugend-Sinde.
Nur – was duet am Schluss no ibrigblyybe,
duet me äggscht emänd e bitzli ibertryybe?

S’isch glaub hitte ganz wie friehner,
bi de Schoof und bi de Hiener.
Au derte hänn doch d’Indianer,
die mit Fädere gschmückte Ami-kaner,
au nonig richtig kenne schryybe
und s’politisch Dängge halt lo blyybe.
Wahlzettel hett me au nit kennt,
so isch me quer dur d’Wieschti grennt.
Oder hett – diräggt vom Indianerzält,
koschteloos, ganz ohni Gäld,
mit Rauchzaiche schnäll e Mäldig gmacht:
E glaini Wolgge – denne kunnt e Frau an d’Macht.
E huffe Rauch – e bitzli gemischt mit Drägg,
scho isch s’Thema Frau ewägg.

Dr Donald John hoggt jetzt uff sym Thron,
das ellai isch scho e Hohn.
Oder isch’s emänd e Drey-D-Schnäll-Kopy?
Doch zwai vo däne – das ka’s nit sy.
Oder isch’s emänd dr Donald Duck perseh,
me ka’s vor lutter Hoor halt nit gnau gseh.
Dr Schnaabel zwor – isch fascht so brait
und egal – wär derte ebbis sait,
s’duet sich alles hailoos glyyche,
kasch baides loose und denn stryyche.

Är schnuurt halt schuurig ummenand
und trumpt nit nur im aigne Land.
Är provoziert wie’s numme gooht
und wird drby – nit emol e bitzli root.
Bsuecht meegligscht alli Staate gly,
und sy Model isch natyrlig au drby.
Do kasch bim Färnseh numme hoffe,
me hett sy Model – und nit ihn sälber troffe,
denn grad bi Farbe und 3Dee,
kasch die Visage numme ungärn gseh.
Doch dr Donald ka das nit verstooh
und hett sy Liebschty zue sich gnooh.
Är polteret und trumplet – s’isch e Gruus,
«Die Schöne und das Biest» im Wysse Huus.

Dr Trump – dä mecht sy Team ney zämmestelle
und hett e bsundri Gruppe welle:
D’Merkel wär als Flüchtling scho drby,
dr Muurer mecht so gärn Beroter sy.
Dr Putin kennt als Kriegs-Minischter schaffe
und dr Holland sozial und druurig ummegaffe.
D’May duet eher royalistisch dängge
und em Trump dr britisch Adels-Titel schängge.
Sir Trump – das wurd jetzt grad no fähle,
do wurd sich d’Clinton no me quäle.
Jetzt fählt no, ass dr Papscht mit groossem Muet,
dr Trump emänd no hailig spräche duet.

In dr Gschicht isch glaub ebbis nit rächt gloffe,
do hänn mir – dr Profässer CKDT troffe.
Historisch duet me sich hit frooge
und sich wissenschaftlig, gaischtig blooge.
Dr Kolumbus hätt doch hit ganz anderscht dänggt
und sy Schiffli meeglischt schnäll versänggt.
Denn wär sy Entdeggig im Atlantik unde
und Amerika mit Sicherhait nit gfunde.
Oder hätt emänd – e groosse Booge gmacht
und sich e Wuche lang in’s Fischtli glacht.
Nur wär dert e huffe glych wie hit,
wo’s doch immer no – gnueg Indianer git.

Emänd nennt me drum die Republikaner,
ehrehalber nur no – Old-Trumpianer.
Politisch wär das scho trumpios,
fir das Amerika – halt grandios.
Do längt sy Bild nimm uff dr Ami-Faahne,
S’muess unbedingt – e Primate-Dänggmool aane.

D’Dummhait styggt glaub uff dr ganze Wält,
und uuse stäche – duet halt vylmeh s’Gäld.
Denn dert im Affe-, nai im Wysse Huus,
wär kunnt denn hitte iberhaubt no druus,

Doch d’Fasnacht – die läbbt ainewääg,
dr Fasnächtler isch – wie immer zwääg.
Bi de drey scheenschte Dääg sin mir drby
und trumple säälig gärn – als Affe hindedry.

D‘Ladärne-Uusstellig uff em Minschterplatz und d‘Waage- und Reggwisyte-Uusstellig bi dr Kasärne sinn vom Mäntig z‘Nacht bis am Mittwuch demorge!

Dr Glunggi-Käller isch an dr Bäumligass 7. Maitli und Buebe ab 7 Joohr, wo wänn lehre drummle oder pfyffe, kenne sich derte am Fritig, 10. Merze vo 13.30 bis 17.00 und am Samschtig, 11 Merze vo 11.00 bis 16.30 yschryybe. S’Iebigslokal isch im Schuelhuus St. Alban, Engelgass 40 z'Basel.

Uuskunft git d‘Obfrau: Sandra Meier, (Tel. 076 382 42 93) und Melanie Lacalamita oder per Mail an unseri Obfraue. De findsch uns au im Netz: www.glunggi.ch