Zeedel 2016

Fasnacht 2016

Glunggi Logo

Fasnachtsclique Glunggi 1966

Sujet:

Fasnacht Futura!
E Wältkulturerbe?

Das wär no s'Dipfli uff em Y,
d'Basler Fasnacht dert drby.

D'Regierig wurd – vo Härze alle gratuliere
und e Cüpli oder zwei spendiere.
Dr Morin duet – das isch z'erwarte,
zwai mool schlugge und denn warte,
nochhäär dunggelroti Bagge kriege
und stirzt sich schnäll in Frack und Fliege.
Doch – das nutzt dr Fasnacht nit grad vyl,
kulturell – isch das kai Basler Zyl.

Es isch au glych, was d'Wältpräss schrybbt,
dr Morgestraich – dä blybbt,
do sin mir denne hailoos stuur,
fir uns isch d'Fasnacht – lang scho Wältkultur.

Das wär denn s'Dipfli uff em Y,
d'Basler Fasnacht do drby.

Muess d‘Unesco d'Fasnacht däwäg eehre,
ass mir ze däre Erbschaft geehre?
Muess das – äggscht wirgglig sy,
nur ass kasch saage: Mir – mir sin drby?

Denn s'Basler Fasnachtstryybe
wird au in Zuekunft ebbis Bsunders blyybe,
denn dr Fasnachts-Witz duet iberlääbe
und d’Stadt Basel wytterhin belääbe.
Jo s'ganzi Fasnachts-Dängge,
duet uns kulturell – nur s’Beschte schängge.
Das isch halt ebbe – Fasnacht pur,
fir uns – gheert das zer Wältkultur.

Fir d'Unesco zellt dr wältwyt Bricht
und e Ytraag fir in d'Schwyzer-Gschicht.
Doch kennte mir als Wältkultur bestooh
und als Dummpeter – an d'Unesco goo?

Das wär zwor s'Dipfli uff em Y,
d'Basler Fasnacht do drby.

So nääbe alte Reemer-Pfanne,
und de antygge Baadewanne.
Nääbe däre Pfahlbau-Siidlig zmitzt im Sumpf,
sin au Wybärge – en Unesco-Trumpf.
Nääbe däne Laube in dr Altstadt z'Bärn,
isch die Rhätisch Bahn – e Wältkulture-Stärn.
Nääbe Schwyzer-Gletscher – die wo's no git,
sin Tessiner Burge e kulturelle Hit.
Mänggi Gipfel in de Alpe – sin regischtriert,
und wärde au – als Wältkulturerb präsentiert.

Gheert äggscht d'Basler Fasnacht in dä Topf?
oder isch emänd e Knibbel – im Unesco-Zopf?
S'Touristik-Zentrum – duet zwor schuurig schwitze,
sy mechte d'Fasnacht – halt uff ewig schütze.

Doch muess das Wältkulturerb wirgglig aane?
Mir gänn doch nundefaane
hailoos Sorg ze unsrem Fescht,
fir uns isch das Kultur – und s'Allergrescht.

Das wär denn grad no s'Dipfli uff em Y,
d'Basler Fasnacht do drby.

Als Wältkulturerb – mänggi Vorschleeg sin no koo,
mir hän e glaini Uuswahl ibernoo:
Die Verkehrs-chaotisch-Stadt,
wär doch – als Kulturerb au no glatt.
Und s'achter Drämmli – bis no Weil,
als Wältkultur – wär das doch geil.
S'Roothuus – mit däne wo schyn's dängge,
kennt me gärn und schnäll – dr Unesco schängge.
S'Stadt-Theater ka me nimm empfähle,
das isch kulturell zem quäle.
Au s‘Casino wurd sich kuum no loohne,
das muess me baulich – none bitzli schoone.
Dr neyi Mässebau – mit Schmuck und Uhre,
do hett's denn zytgemässy Wältkulture.
Und dr schieffi Turm vo Roche-Chemie,
kennt doch au – e Wältkulturerb sy.

Das wär s’glaine Dipfli uff em Y,
nur – isch do emänd Kultur drby?

Bruucht’s e globale Schutz fir’s Fasnachts-Lääbe,
oder isch au dä Gedangge ganz drnääbe?
Isch esone Schutz en Ehr
oder laschtet's eher schweer?
S’git emänd e Schutz fir’s Dialäggt,
das isch jo au nimm ganz perfäggt.
Sin d’Lääde z‘Basel zue – oder sin sy dicht,
fir d‘Wältkultur – e hailoos ärnschti Gschicht.

Das wär denn s'Dipfli uff em Y,
d'Basler Fasnacht do drby.

Und fir d’Fasnacht sälber – das isch d’Froog,
wär das e Fraid – emänd e Bloog?
Oder kennte mir denn profitiere,
grad hitte – wo mir dien jubiliere?
Denn – sit 50 Joohr sin mir drby,
das isch Wältkultur – wie's nur ka sy,
und ebbis – wo soo lang heebe duet, isch doch aifach – kaibe guet.

Nur wie gseeht‘s äggscht uus in 50 Joohr,
isch unsri Fasnacht denn in Gfoohr?
E rächte Bebbi sait do – sicher nit,
well's au in Zuekunft unsri Fasnacht git,
wo mir e jede Waggis heeflig griesse
und s’Drummle und au s’Pfyffe gniesse,
d’Gugge uff em Seiby schränze.
und d’Latärne in de beschte Farbe glänze.

An däne drey so scheene Dääg,
sin mir das Joohr – bsunders zwääg
und fyyre bis am friehe Morge
d’Fasnachtszyt – ganz ohni Sorge,
und wär weiss – wenn mir dien jubiliere,
kunnt d’Unesco – zem de Glunggi z‘gratuliere.

Und so isch s‘beschte Dipfli uff em Y, sit 50 Joohr als Fasnachts-Wältkultur drby.

D‘Ladärne-Uusstellig uff em Minschterplatz und d‘Waage- und Reggwisyte-Uusstellig bi dr Kasärne sin vom Mäntig z‘Nacht bis am Mittwuch demorge!

Dr Glunggi-Käller isch an dr Bäumligass 7. Maitli und Buebe ab 7 Joohr, wo wänn lehre drummle oder pfyffe, kenne sich derte am Samschtig, 20. und 27. Februar vo 13.00 bis 14.30 yschryybe. S’Iebigslokal isch im Schuelhuus St. Alban, Engelgass 40.

Uuskunft git d‘Obfrau: Jeannine Dähler, Tel. 076 580 32 22 oder obfrau-jg@glunggi.ch. De findsch uns au im Netz: www.glunggi.ch