Zeedel 2015

Fasnacht 2015

Glunggi Logo

Fasnachtsclique Glunggi 1966

Sujet:

Losch di au
ver–ÄPP–le

Ohni ÄPP's bisch hit nimm in,
nur mit ÄPP's — hesch ächte Lääbesgwinn!
ÄPP's gehn um die ganzi Wält,
au do regiert halt s'liebi Gäld.

Doch ver–ÄPP–le los my nit,
au wenn's efange ÄPP's fir alles git.

Nur ohni ÄPP's kunsch niene aane,
doch ebbe — wird'sch ver–ÄPP–let nundefaane.
Me fahrt im Drämmli grad in d’Stadt,
au das isch nimme — numme glatt.
Gseh’sch alli uff em Smartphone ummedrugge,
kennt’sch maine — s’isch e Wundergugge,
sy sueche ÄPP‘s — s‘vergooht aim s'Lache,
me mecht doch nur — e digitali Mäldig mache.
Nur muess me zerscht die ÄPP’s–Fluet iberwinde,
doch vor lutter ÄPP's — kasch s'Delifon nimm finde.

Doch ver–ÄPP–le los my nit,
au wenn's efange ÄPP's fir alles git.

S'git ÄPP's fir d'Nacht und fir e Daag,
natyrlig ÄPP's fir jedi Lääbeslaag,
mit de beschte Rootschleeg — das isch klar,
nur zahlt me die denn grad in bar.
Statt in de Heftli lang go sueche,
ka me s'Horoskop als ÄPP hit bueche.
Nur uff die maischte Zuekunfts–Gschichte,
ka–n–ich denne au als ÄPP verzichte.

Denn ver–ÄPP–le los my nit,
au wenn's efange ÄPP's fir alles git.

ÄPP's die bruucht me unbedingt,
so isch me freehlig und beschwingt.
ÄPP‘s zem uffstooh — me losst sich wegge,
die git's harmonisch — oder zem verschregge.
ÄPP's kasch wähle — zwische Hind wo bälle
und ere grälle Alpe–Schälle.
Au e schrilly Pfyffe ka me aabelaade
oder s'gmietlig Blätschere bim Baade.
Au Gluggse oder Gorbse — wär no scheen,
doch am friehe Morge nit die beschte Deen.
S’git au ÄPP's mit Muusig — und s’wär bsunders nätt,
wenn me scho dr „Tutti–Frutti“ hätt.

Doch au doo — ver–ÄPP–le los my nit,
au wenn's efange ÄPP's fir alles git.

S'Wätter muess me nimm am Radio loose,
ai ÄPP ka Wind und Wätter grad in d'Stuube bloose.
Doch mängg Programm isch glaub nit dicht,
do kunnt jo statt dr gwohnti Wätterbricht,
dä Bricht scho dreidimensional,
spührbar — kolossal,
als Mäldig all's wie schlimmer,
dr Rääge grad diräggt in's Zimmer.
Iber sone ÄPP — wird gar nit noochedänggt
und grad Meteo–Schwyz — als Zuegoob gschänggt.

Doch ver–ÄPP–le los my nit,
wenn's au efange ÄPP's fir alles git.

Au d'Partnerwahl
lauft hitte digital.
S’git ÄPP‘s fir Wybli — ÄPP’s fir Manne,
wenn die wänn zämmespanne
ka me nur no stuune,
denn die Foteli — die hebe d’Luune.
Duusig Bildli kasch dert finde,
alli grad vo vorne und vo hinde.
Doch hesch denn Luscht no meh,
mecht'sch gärn — no ebbis bsunders gseh,
denn kunnt's ganz droche,
Verbindig unterbroche.

Doch ver–ÄPP–le los my nit,
au wenn's efange ÄPP's fir alles git.

Au fir's Liebeslääbe ka me ÄPP's go frooge,
dert kunnt alles vo de Aschtrolooge,
wo s'Wisse uus de Stärne nämme,
so mien sich d'ÄPP'sli scho nit schämme.
Denn was derte alles stooht,
halt scho — e bitzli ins Intime gooht.
Die ÄPP's — s'isch nit zem glaube,
kennte aim sogar no d'Nachtrueh raube.
Scho in dr Schuel wird driber noochedänggt,
doch kaini ÄPP's — nai Köfferli verschänggt.
D'Sexualkund — grad im Klassezimmer,
zaigt's denn dytliger — doch dimmer.
Die Stund per ÄPP's — s‘gäb wenig Klaage,
me wurd mit Sicherhait — kai Grangget ibertraage.

Ich hoff, ass die ÄPP's — no lang nit git,
denn ver–ÄPP–le los my nundefaane nit.

ÄPP’s bestimme hit dr Lääbesoobe,
das ellai isch gaischtig scho verschoobe.
S’git ÄPP’s — emänd fir jedi Froog,
das gooht uff d‘Närve — s’isch e Bloog.
Me ka die ÄPP‘s scho bald nimm zelle
und duet ainewäg — no wytter bschtelle,
bis dr Spyycher reklamiert
und alles wyttere storniert.
Me hett's halt wirgglig ibertriibe,
drum wird als Memo uff e Bildschirm gschriibe:
"Die letzten ÄPP's sind endlich zu bezahlen,
sonst erleben sie die schlimmsten Qualen".
Das deent hart — belaschtet schwäär,
scho sin alli ÄPP's ewägg — dr Bildschirm läär.

Me waiss bald nimm — was no alles git,
nur ver–ÄPP–le — leehn mir uns alli nit.

D‘Ladärne-Uusstellig uff em Minschterplatz und d‘Waage- und Reggwisyte-Uusstellig bi dr Kasärne sin vom Mäntig z‘Nacht bis am Mittwuch demorge!

Dr Glunggi-Käller isch an dr Bäumligass 7. Maitli und Buebe ab 7 Joohr, wo wänn lehre drummle oder pfyffe, kenne sich derte am Samschtig, 28. Februar und 7. Merze vo 13.00 bis 14.30 yschryybe. S’Iebigslokal isch im Schuelhuus „Mugge“ grad bim Minschterplatz.

Uuskunft git d‘Obfrau: Jeannine Dähler, Tel. 076 580 32 22 oder jeannine.daehler@glunggi.ch. De findsch uns au im Netz: www.glunggi.ch