Zeedel 2013

Fasnacht 2013

Glunggi Logo

Fasnachtsclique Glunggi 1966

Sujet:

Hesch Mumm und zeigsch s’Gsicht ganz

Dr Mummeschanz,
e ganz vermummte Tanz,
dert hett sogar s’Vermumme,
40-Joohr lang gschtumme.

Vermumme hett glaub scho zwai Sytte,
me ka s‘Vermumme drum verschiide dytte.
Mecht me ebbis äggscht verdegge
oder anderi drmit verschregge?
Bim vermumme stellt sich ganz e haigli Froog,
denn s’vermumme isch emänd e Bloog.
Me zaigt sich von ere andre Sicht,
welles isch äggscht s’woohre Gsicht?
Mecht me s’aige Gsicht nit präsentiere
oder ebbe halt drmit – sy Gsicht verliere?
Heb doch Mumm – und zaig dy Gsicht,
bevor dr guet Charakter zämmebricht.

Doch vermumme und verstegge,
ka au wytteri Gedangge wegge.
Me luegt in Spiegel, frieh am Morge,
do gseht me d’Wiggig vo de Sorge.
So duet aim s’aige Gsicht nimm gfalle,
gallertig wie e Meeres-Qualle
oder runzlig wie e Falte-Rogg,
zem reschtauriere uff em Droggedogg.
So hett s’vermumme glaub e Sinn
und fir s‘Outfit – au e bitz e Gwinn.
Nur bi dr Street Parade git’s kai vermumme,
die hänn Mumm, doch gar kai Stoff drumumme.

Im Gsundhaitswääse,
ka me zwischenyyne lääse,
me kennt doch s’Gsicht ney gschtalte,
kaine muess e krummi Naase bhalte.
Statt vermumme ka me au verdegge
und s’Gsicht zer neye Jugend wegge.
In jedi Falte duet me Puder drugge
und drzue no Anti-Aging-Pille schlugge.
Nur wenn die Puder-Schicht denn zämmebricht,
hesch Mumm – und zaig dy richtig Gsicht.
Mit Botox spritzt me d‘Bagge prall
und stoppt sy vor em tiefi Fall.
D’Lippe druggt‘s denn wytter uuse,
e richtig Hindernis bim schmuuse.
Dr Kerper ka me farbig-scheen bemoole
und drmit d’Kontuure fiire hoole.
Body-Painting haisst das hit uff dytsch,
s‘isch modärni Kunscht und jo kai Kitsch.
E Glatze isch hit nimm modärn,
dä erotisch Spiegel hett me nit so gärn,
drum duet me d’Hutt mit Blastig-Hoohr belegge
und die blutti Stell mit Fluum bedegge.
E Tattoo am Fuudi und am Buuch,
isch gschichtlig halt e hail‘ge Bruuch.
Wenn e Piercing glatt dur d’Nase gooht,
sait me däm – dr silbrig Stacheldrooht.
Das vermummt zwoor nur e Dail vom Gsicht,
doch fir’s Image drait me gärn das Iber-Gwicht.
Do lachsch dr grad e Schranz,
s’isch ganz en andri Art vo Mummeschanz.

Au wägem Glaube muess me nit verzaage
und ka dä raabe-schwarzi Schleier traage.
Me ka au mit ere iberlange Kutte,
s’meischt vermumme – s’meischt vom Blutte.
Doch vermumm‘sch dr Kerper ganz,
maint me sicher nit dr Mummeschanz.
Gläubig laufe Wybli in dr Burka umme
und dien sich däwäg ganz vermumme.
Uff dr Strooss – do mag’s no goo,
nur im Hallebad – wärde die nit ynegloo,
denn in dr Badi und dr Thermogrotte,
wird s’baade in dr Burka glatt verbotte.
Baade kasch im Badklaid oder im Bikini,
erlaubt isch gsetzlig kai Burkini.
Wär vermummt das Aqua-Planing macht,
kunnt als hailoos Beese in Verdacht.

An dr Demo finde’s die Vermummte guet,
doch vermummt sy – bruucht kai Muet,
do mag d‘Kapuze zem verstegge nutze,
nur ka’s e Mängge nit verbutze,
denn me ka d‘Visage nimm erkenne
und die Vermummte nit bim Namme nenne.
Hänn’d doch Mumm – und zaiget s‘Gsicht,
denn die Vermummig – isch e Fall fir’s Gricht.

De Biinezichter isch es nur z’empfähle,
wenn die als Schutz e Schleier wähle
und me denn no stinggt und raucht drzue,
hett me vor de Biinestich sy Rueh.
Uff dä Schleier ka me sich verlooh,
s’vermumme ka me denn verstooh.
Au im Winter, tief im Schnee,
kasch am Schylift vyl Vermummti gseh.

E scheeni Zyt – wo vyl Vermummti ummerenne, doch au denne – duet me kain erkenne, e Zyt – wo’s numme guet Vermummti git, s’haisst jo: Gäll – du kennsch my nit? Denn duet me z‘Basel ime Goschtym lääbe und drei Daag in de Wolgge schwääbe. Wenn denn d‘Fasnachts-Muusig wiider dehnt, isch me die Vermummig beschtens gwehnt.