Zeedel 2010

Fasnacht 2010

Glunggi Logo

Fasnachtsclique Glunggi 1966

Sujet:

Dr fuudiblutti Wahnsinn!

D’Natur erwacht, in voller Blietepracht,
doch uusesticht – e fuudiblutti Macht!

Im Albstai hett me Blutti gseh,
dr Landgmeind duet das hailoos weh,
und au dr Landroot isch perplex,
isch das erotisch – oder aifach sex?
Das deent emänd e bitzli glaikariert,
und politisch – sicher nit fundiert.
Nur d‘Regierig hett by Gott kai Fraid,
sy wänn kai Eros-Zenter uff dr Waid.

D’Wächter vo däm Alpstai-Land
finde blutti Wanderer e Schand,
au schamloos finde’s d’Bolizischte,
Blutti gheere doch in d‘Kischte.
Fir dä Aabligg und die Quale
sette die doch aifach Buesse zahle.
Doch hett das e Schwiirigkait,
wenn me kaini Hoose drait.
S’Glaigäld kasch nit aifach schlugge
und d’Zwanzgernoote nit in’s Fuudi drugge.

Eso erwacht d’Natur in voller Blietepracht,
s’Appezäll hett jetzt – e fuudiblutti Macht!

Zmitzt im Wald hett’s ney en Imbissstand,
do git me d’Kleider ab als Pfand,
und wand‘ret denne wie sich’s gheert
dr blutti Aabligg isch zwoor unerheehrt –
durch Wald und Stai und Wanderwääg,
so blybt dr Appezäller Eros zwääg.
Nur sett me d’Wanderwäägli ney beschryybe,
wenn die Blutte dert – dä Bio-Kult betryybe,
au muess me d‘Schilder ney verwalte,
und emänd mit Tanga-Höösli gschtalte.

Und grad bim näggschte Halt – s’isch gschpunne,
hoggt aine fiidleblutt im Brunne
und wäscht grad alles bis zem Fuess,
das git e klaari Appezäller-Buess.
Schnäll gumpt dä uff und segglet ab,
denn wird au s’letschte Daili schlapp.
Do wird‘sch im Gsicht grad root,
wenn me imme Blutte gegeniber stooht,
au wenn dä Aabligg aim no frait,
ass dä gar nyt uff sich drait,
duesch doch im Stille dängge,
däm kennt’sch – e Aicheblettli schängge.

D’Natur erwacht, in voller Blietepracht,
doch uusesticht – e fuudiblutti Macht!

Au d‘Joodler stehn ganz blutt im Gländ,
wisse nit, wo aane mit de Händ.
Drnääbe duet ain Alphorn bloose,
wie sich’s gheert – ganz ohni Hoose.
S’Chöörli trilleret so vor sich aane,
derf‘sch nit luege – muesch‘s eraane.
Und ass niemer muess verschregge,
nimmt me d‘Noote – zem das Bitzeli z‘verstegge.
Die mit dr Klarinette mien pressiere,
ass me uff em Albstai nit duet friere.
Ai Trompete g’heert me hailoos lutt,
zaigt aber nääbeby e huffe Hutt.
Dä mit em Bass – dä hett am maischte Gligg,
und versteggt legal – sy prächtig Stigg.
Urchig gheert me’s uff dr Matte,
nur git e Schwyzerörgeli kai Schatte.
Drnääbe duet dr Seppli Faahneschwinge
und im Alpstai – die erotisch Stimmig bringe.

D’Natur erwacht, in voller Blietepracht,
jetzt gseht me au – die fuudiblutti Macht!

E haili Wält bricht zämme,
s’Appezäll – das muess sich schämme.
Me frooge sich nur – wieso denn au,
wär steert sich – am e scheene Kerperbau?
E huffe Hutt und Hoohr – das isch Natur,
und ebbe – Fuudiblutt-Kultur.
Gly gseh‘sch – statt Männertreu und Enziane,
e Fuudi uff dr Wandergrubbe-Faahne.

Die neji Wälle isch im koo,
im Alpstai isch me zwor nit froh,
me leggt doch Wärt uff‘s guet verdegge,
denn glaini Kinder will me nit verschregge.
Das Wandern isch des Müller’s Luscht,
singt me hit mit blutter Bruscht.
Das isch kai neye Schwyzer-Wahn,
s’gheert numme zem – Naturaplan.

Do gseh‘sch d’Natur in voller Blietepracht,
und uusesticht – die fuudiblutti Macht!