Zeedel 2009

Fasnacht 2009

Glunggi Logo

Fasnachtsclique Glunggi 1966

Sujet:

B wie Botellòn

Botellòn - dasch e grossi Fläsche
Nid e lääbigi uff zwai Bai
Nai, si hett Blatz in ere Däsche
Und isch nimm nur in Spanie dehai

Spanisch isch schynts das neye Wort
Und Spanisch kunnts mir au so vor
Rusch-Suffe als öffentlige "Sport"
Isch fir unsri Junge e Gfohr

Sait vo dr Sicherhait dr Hanspi Gass
Dä wär jo am liebschte sälber drby
Kai Alk fir U18 will dä, ganz krass
Dä schwätzt doch nääbem Volgg verby

Organisiert wird nur per eSeMeS
Und Mund zu Mund oder Internet
Unsri Schugger sinn lycht im Stress
Will s in däm Fall kai Schuldige hett

Sälbergmixti Fläsche, grad lyterwyys
Voll Gsöff - Hauptsach s hett Alkohool
Bi unsre Baizebryyse isch s brezyys
E super Idee – und en Aigegool

D Bryyse sinn zwor au en Aschpäggt
Nid dä, won ys eso z dängge git
S fählt an Erziehig und Reschpäggt
Dä Abfall und Drägg - dä gfallt ys nid

Ab-fall isch do wirgglig weertlig z näh
D Graviteet nimmt däne d Aarbet ab
Au wenn s dausig Kiibel wurdi gäh
Dr Drägg in däre Stadt nimmt nid ab

Nid nur am Harasselauf, dasch e Saich
Au sunsch immer mee uff dr Gass
Dringge sich au Kinder d Biire waich
Und entsorge uff dr Gass macht Spass

Suffe bis zem umkeye gits scho lang
Am Stammdisch blöffe gärn au die Alte
Denn im Griene Gwand, do gits dä Drang
Und au am Stadtfescht gits kai halte

S git scho s Alkverbott im Stadioon
Au bim rauche isch s nur dr erschti Schritt
D Fasnacht isch all Johr e Botellón
Bald gits au dört nur no Bier ohni Sprit

Statt mee Repressioon, Schugger und Gsetz
Wo nyt nutze und ys Styyrgäld koschte
Begägnigszoone fir Jungi bruuchtis jetz
Au d Bildig und Erziehig darf nid roschte

Denn sinn mee Jungi mol ab dr Strooss
Trybe Sport und hänn au sunnsch no z due
Gäbs d Botellòn in Basel nimmi gross
Nur an dr Fasnacht, deert gheerts derzue