Glunggi-Logo

Zeedel Jungi 2018

Fasnacht 2018

Glunggi Logo

Fasnachtsclique Glunggi 1966
Jungi Garde + Binggis

Sujet:

Dr Kaländer schpinnt

E lyychte Nääbel liggt überem Rhy
S isch Herbscht und d Herbschtmäss kunnt scho gly,
Am Sunntig gang y mit em Götti aane
Und faar denn uff de gröschte Baane.
Drwyyl y vor mi aanedröim
Gseen y die erschte Wiehnachtsböim,
Y ha no kai Mässmogge gha
Do sinn scho d Grättimänner dra!
Es isch e Schock und nimmt dr Spass
Zletscht weggts sogar e bitzi Hass
Dass alles durenander kunnt
Das wird mir wigglig langsam z bunt.
Wenn Schänggeli und Faschtewääije
Scho am Silveschter «kauf mi» krääije,
Wenn d Ängel Haasenoore draage
Denn isch es wigglig Zyt zem klaage.
Dr Oschterhaas het syni Gselle,
Nur die sottsch nääben aane stelle:
Wenn d Primeli uss em Boode schiesse
Kasch ändlig wider Gitzi gniesse;
Dr Biskuit-Daig wird zum Lämmli bache
S gitt Schoggi und anderi feyni Sache;
Sogar Griess kasch als Oschterfläädli ässe
Suscht bin y uff Griess überhaupt nid versässe.
Aber all das ka nur richtig wirgge
Wenn nid alles durenand duesch schlirgge
E jeedi Saison trumpft mit öbbis uff
Und allewyl fröi y mi ganz fescht druff
Ämmel friener ischs eso gsi
Das macht hütt d Wäärbig laider hi.
By aller Kritygg isch mir scho klaar,
Mängisch isch es nid vermiidbaar:
Dr Chrischtbaum isch noonig usegschtellt,
Do wird scho s alte Joor aabezellt!
Aber maischtens könnt me scho no warte,
Bevor me mit em näggschte duet starte.
Nur eins, das find ich dr grossi Hit
Au d Sportwält macht azyklisch mit:
Dr FCB machts frieh scho klaar,
S gitt d Maischterfyyr im Februaar.
Mee Sorge macht mer scho no s’Klima
Tornados all Joor sin nid prima!
Au wenns dr Trump nid mergge wott
Dä spinnt scho lengscht, dr Wättergott:
Zum sicher Schnee under d Schi z bykoo
Muesch hüttzudag uff Abu Dhabi goo
Em Schaich si Halle bringt Wintervergniege
Das macht mer Sorge – y wott nid liege.
Aber s Wätter isch nid s ainzig Phänomeen
Wo mir d Erosioon vo dr Ornig gseen.
Im Laade isch dr Jooreszyttverlauf
Numme wichtig für e bessere Verkauf,
D Marketing-Lüt hän nur ains im Sinn
Mee Umsatz und e grössere Gwinn!
Wär frie aafoot verkauft au mee,
Das kasch in jedere Migros gsee.
Sy Gschäft am beschte optimiert,
Wär bim Verkaufsstart fescht pressiert.
Nur blybbt drby vyyl uff dr Stregge,
Nid numme d Abwäggslig bi de Begge.
Nay, kindligi Fröid und Emozioone
Wo däne Fyyrtig innewoone,
Sinn laider ganz und gar vergässe,
Wenn me sich nur am Gwinn duet mässe!
Ych will die Tradizioone haa,
Dr Oschterhaas, dr Grättimaa;
Denn sunscht ischs Lääbe immer glyych,
D Kultuur isch nur dangg Brüüch so ryych!
Das hett d Unesco ändlig kapiert
Und unseri Fasnacht jetz au prämiert!
Mir junge Glunggi sind gärn kulturell,
Das entspricht voll unserem Naturell,
Und voll im Trend sinn mir au no,
Wottsch nid zu uns in d’Clique ko?
By uns wird Tradizioon schön pfläggt
Und saisonal passendi Dääfi gschläggt,
S ganz Joor goot bi uns d Poscht voll ab
Nid numme d Fasnacht haltet uff Trab,
Die Fründschafte wo mir knüpfe könne,
Wurde mir gärn no mänggem gönne.
Näb Oschtere- und Wiehnachtsfescht,
Sin d’Glunggi-Aaläss aifach s Bescht!

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschtig 24. Hornig vom elfi bis am zwai yyschrybe. S'Yebigslokal isch im Schuelhuus St. Alban, Engelgasse 40 z'Basel
Usskunft gänn d'Obfraue Sandra Meier und Melandie Lacalamita, Mail: obfrau-jg@glunggi.ch.

De findsch ys au im Netz under www.glunggi.ch

Am Frytig, 23. Hornig vom ains bis am fünfi und am Samschtig, 24. Hornig vom elfi bis halb fünfi findet me yw au an unserem Stand im Zält vo dr Erschte Lektion uff em Barfi.

D Ladärnenusschtellig isch vom Mändig znacht, em 6. Merze bis am Mittwuch demorge, em 8. Merze uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.