Zeedel Jungi Garde 2017

Fasnacht 2017

Glunggi Logo

Fasnachtsclique Glunggi
Jungi Garde + Binggis

50 Joor luschtigs Taschebuech
mir lääse's au

Jetzt isch ändlig Sagggäldzyt
Und kai Kiosk isch mir hüt z’wyt
I wurd au gärn no wyter laufe
Zums neuschte LTB go kaufe
E Wuche lang das bange Warte
Bis ich ka mit em Lääse starte!
Die Äntehuusener Kommune
Bringt mi immer neu zum Schtuune
Dr Mickey wo schlicht alles ka
Wär ooni Goofy oft blöd dra
Denn dä, obwool e riise Schussel
Het z’letscht doch immer no gnueg Dussel
Är schtolperet und loot lo goo
PÄNG PUFF – dr Böösi isch k.o.
Au het är uffem Eschtrig oobe
Vyl Wunderzüüg und Zaubergoobe
Wo se uss allne Gfoore rette
So kunnts als guet – dodruff kasch wette!
Es gwinnt halt immer Gsetz und Rächt
Dr Kater Karlo findet’s schlächt.
Dr Donald isch ganz nach mim Gschmagg
Trotz Fuulhait isch är ächt uff Zagg
Wär Hilf bruucht ka sich druff verloo
Dr Donald isch für anderi doo
E Härz uss Gold und seer vyl Muet
Do kunnts am Ändi immer guet
Ob uffem oder underem Meer,
Ob mit Harpune oder Gweer,
Mit Kraft oder eender mit Verschtand
Het dr Donald scho gly Überhand.
Und wenn’s dr Donald nid schaffe ka
Denn isch halt dr Phantomias dra.
Tick,Trick und Track und s’schlaue Buech
Sin unverzichtbar uff dr Suech
Noch saagehafte Schätz uss Gold
Nur saagehaft isch nid dr Sold
Wo dr Dagobert denn useruggt
Kai Wunder sin die drey verruggt,
So gyyzig ka nur aine sy
Är laadet kain ins Gäldbad yy.
Dr Düsentrieb, dr gross Erfinder
Isch en Idool für vyyli Kinder
Denn är ka alles konschtruiere
Blibt ganz beschaide, kai plagiere
Verschänggt si Wüsse immer gärn
Denn Gäldgyyr isch em ganz ganz färn
Nur fäält em nid nur s Gfüül für Gwinn
Si Wärk het mängisch nid vyl Sinn!
In Äntehuuse isch halt nid alles toll
Es git näbe Dur scho au no Moll.
E bitz Kritik und Hinterfrooge
Will ich an dere Stell no wooge.
Ich muess ai Froog halt wirgligg schtelle
Denn d’Antwort wills LTB nid verzelle.
Es git so sälte Bappe und Soon
Nai, s’isch zmaischt en anderi Konschtellazioon
Was hänn die Ducks gege Eltereschaft
Was het si alli zu Waise gmacht?
Und wird dr Düsentrieb sy Hälferli bhalte
Wenn dört au Schtromsparpäbscht dien walte?
Wär het scho e Biiremännli gsee
Mit statt dr Biire LED?
Aber öbbis gfallt mer bsunders guet
Es git im LTB kai Bluet
Egal wie schlimm en Unfall isch
Es landet kain uffem Pathologedisch
Es git zwaar mängisch scho Blessure
Die haile aber ooni Kuure.
Das wünscht ich mir fürs woore Lääbe
Dass Gegner sich am Änd vergääbe
Und zämme an aim Schtrigg dien zie
In Wirggligkeit bassiert das nie
Oder zmindescht aber seer seer sälte
So isch das in reelle Wälte
Mir mien halt unsere Byytrag laischte
Dass d’Wält sich besseret für die Maischte
Drum isch e friedligs Zämmesyy
Bi uns Junge Glunggi kai Theory!

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Frytig, 10 Merze vom halber zwai bis am fünfi oder am Samschtig, 11. Merze vom elfi bis am halb fünfi yyschrybe.
Usskunft: Sandra Meier und Melandie Lacalamita per Mail an unseri Obfraue.

De findsch ys au im Netz under www.glunggi.ch

Am Frytig, 10. Merze vom halb zwai bis am fünfi und am Samschtig, 11. Merze vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 6. Merze bis am Mittwuch demorge, em 8. Merze uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.