Zeedel Jungi Garde 2016

Fasnacht 2016

Glunggi Logo

Fasnachtsclique Glunggi
Jungi Garde + Binggis

Dr Glunggi Stamm wird 50 Joor —
mir stellen ys als d Zuekunft vor

Scho 50 Joor gits unsri Clique
Do kamme dief in d Chronigg ligge.
E huffe Gschichte gits z verzelle
Und ohni übertryybe z welle
Luegsch in e riise Ahnegalerii
Sogar myni Grosseltere sinn drby
Und au mi Mamme und mi Babbe
Dien als Glunggi ummedabbe.
Scho sit frieschter Kinderzyt
Grieg ich die ganze Gschichte mit
Vom Bolle wo nid still ka schtoo
Kuum het är s Piccolo uffegnoo,
Vo dr Senga und iirem Portmenee
Wo me bim Zaale nümm het gsee,
Vom Hansjörg wo sich jedes Joor
Für Uffwand, mängisch au under Gfoor
E Fasnachtsknaller ussdänggt het,
Im Stamm isch gloffe mänggi Wett
Was är am Bummel biete wurd!
Es isch e Jammer sin die hütt furt.
Die alli und no vyyli mee
Het me in unsre Raaie gsee!
Mir hänn es sone ryychi Gschicht
Au unsri Zuekunft hett e Gsicht!
I due mir mängisch so ussmoole
Wär mir no in unsri Clique hoole,
Und wie die, wo jetz mit mir drummle
In 50 Joor durs Lääbe bummle.
Mir wärde denn scho Räntner sy
Hänns Arbetslääbe lengscht verby
Als Schlosser oder Bürolischt
Als Doggder oder Journalischt.
Wär waiss in weelem Bruef ych land
E mängge läägi uff dr Hand!
Was wurd sich ächt am Maischte loone
Vo X verschiidene Opzioone?
Wird ych die wytti Wält beraise,
E riise Bauprojäggt uffglaise
In 20 Joor drey Kinder ha
E Hüüsli und e liebe Maa?
Villicht sin Hüüsli denn lengscht out
Und s wird nur no verdichtet baut.
Obs Auti denn ächt au no git
Benziinfrey oder immer no mit?
Ischs Drämmli denn no grien und gääl
Faarts underem Boode oder uff Pfääl?
Dien mir denn immer no Whatsup nutze
Und s Sagggäld wytter bar verputze?
Duet uffem Grill no s Blätzli bruzzle
Und dr Münchner sini Wysswurscht zuzzle?
Oder lääbe mir denn alli vegaan
Noch em Ayurveeda-Ässensplan?
Duet me no Määlsuppe zueberaite
Bi allne Glutenunverdrägligkaite?
Wird denn no öbber Zyttig lääse
Und d Woonig wüsche mit em Bääse
Oder beamt s Netz d News diräggt in Kopf
Und dr Putzroboter dr Drägg in Topf?
Isch Gwalt und Krieg denn überwunde
Und hämmer dr Friide ändlig gfunde?
Jä, d Wält mag ganz en andri sy
Doch ains waiss ych mit Garantii:
Am Morgestraich in 50 Joor
Do schtöön mir y, mit dünne Hoor
Mit Glatze und Arthritis-Schmärze
Und mache Fasnacht mit ganzem Härze,
Mir als Stamm und bi de Alte
Und anderi dien als Jungi walte.
Ains isch sicher und au woor
Uns Glunggi gits au mit 100 Joor!

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 20. Hornig. oder 27. Hornig am Nomidaag vom eins bis am halb drey yyschrybe.
Usskunft: Jeannine Dähler, Tel. 076 580 32 22

De findsch ys au im Netz under www.glunggi.ch

Am Frytig 19. Hornig vom ains bis am fünfi und am Samschtig, 20. Hornig vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 15. Hornig bis am Mittwuch demorge, em 17. Hornig uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.