Zeedel Jungi Garde 2015

Fasnacht 2015

Glunggi Logo

Fasnachtsclique Glunggi
Jungi Garde + Binggis

Hakuna Matata oder
Dr Leuekönig kunnt uff Basel

Dr Simba ka sich nid beklaage
an ihm dien käini Sorge naage
Dr ganz Daag duet är ummetolle
im Fründschaftskampf am Boode rolle
dr Mueter s Znüni schnäll schtibitze
em Babbe d Oore ummelitze
am Bach die schüüche Gnu verschregge
dr Schtägge vom waise Aff verschtegge.
Es könnt so ewig wytergoo
wärs Unheil nid so furchbar noo
me ka em Schiggsal nid entrinne.
Dr Unggle duet noch Böösem sinne
dr glaini Prinz, dä soll verschwinde
so ka me d Droonfolg unterbinde
und sich sälber krööne loo
sött denn dr König undergoo.
Dr Unggle kennt e mängi Lischt
är isch bygott kai Pazifischt
und schiggt dr Simba dief in d Schlucht
wo d Antilope uff dr Flucht
grad alles übere Huffe renne
dr König, alarmiert, duet denne
zur Rettig vo sym einzige Kind
sich vor ihns wärfe no ganz gschwind
und losst sich heldehaft und muetig
zum Hüffeli trample, tot und bluetig.
Dr Simba gseets und isch entsetzt
„Wär ich doch nur nid aabegwetzt
do in die Schlucht in all die Not“
was wotti no, mi Paps isch tot
und schuld do dra bi numme ych
ych darfs nid erbe, s Königrych.
In d Fremdi mues y, wyt wyt furt
verby ischs mit dr eedle Geburt
e ganz normals Tier will ych sy
mit simpler Lääbensfylosofyy.
So lauft dr Simba vyli Dääg
und findet au am Änd vom Wääg
scho gly e neue Fründeskreis
und isch froh dass dört kaine weiss
was är scho uffem Kerbholz hett.
Vergässe isch e kuschligs Bett!
Es isch als hätts kai geschter gää
dr Simba losst sich d Freud nid nää
zum mit em Pumbaa umme z schtriele
im Dschungel zmitts in allne Niele.
E Baad im Bach muess jetz no syy
s Ärdmännli Timon isch au drbyy.
Die drey sin beschti Fründe worde
si gniesse, dien nid überborde
und kaine dänggt, was in dr Heimat
vom Simba könnt passiere grad:
D Hyääne nämme überhand
si sitze fescht im ganze Land
die andere Tier hän kaini Rächt
em Königrych goots furchbar schlächt.
Zum Troscht e Znacht kasch grad vergässe
d Hyääne hän scho alles gfrässe.
Es ka au gar nie besser wärde
denn niemerts loost me in dr Härde
em Rafiki syne Rootschleeg zue.
Dä sait sich dorum: „Ych ha gnue
ych suech mir jetz e bessere Ort“
und paggt si Schtägge, haltet Wort.
Är macht sich uff dr Simba z finde
nur dä ka s Unglügg überwinde
und s Königrych sofort erlöse
vo de Hyääne, däne böse.
Nach daagelanger Wanderschaft
hets dr Rafiki ändlig gschafft,
dr Simba losst sich motiviere
sy Königstitel z regglamiere.
Är kunnt drum mit em Rafiki hai
und macht de Hyääne sofort Bai.
Im ganze Land schyynt widr d Sunne
es het zum Glügg zletscht s Guete gwunne
und alli hän vor Freud lutt gsunge.
So döönts au bi uns Glunggi Junge!

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 28. Hornig. oder 7. Merze am Nomidaag vom eins bis am halb drey yyschrybe.
Usskunft: Jeannine Dähler, Tel. 076 580 32 22

De findsch ys au im Netz under www.glunggi.ch

Am Frytig 27. Hornig vom halb zwai bis am fünfi und am Samschtig, 28. Hornig vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 23. Hornig bis am Mittwuch demorge, em 25. Hornig uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.