Zeedel Jungi Garde 2014

Fasnacht 2014

Glunggi Logo

Fasnachtsclique Glunggi
Jungi Garde + Binggis

E Rutschi in Rhy, mir sin drby

E Franzi-Tescht und Geografie
am Nomidaag Dütsch und Biologie,
dä Schueldaag het mi wirgglig gschafft
am Oobe fäält mir jeedi Kraft.
Um mi jetz guet z’regeneriere
gang ych ans Rhybord go flaniere.
E Redbull macht mi wieder wach
und jetz e Schwumm im kiele Bach,
das bringt mir d Läbenskraft grad zrugg.
Ych dryb ganz friedlig under d Brugg,
am Pfyler darf ych nid znooch dra -
ych ha bishär kai Unfall gha
und das soll wyterhin so blybe -
es isch so heilsaam aifach z’drybe,
d‘ Stadt langsam so verby zie loo,
ych loss my ändlig richtig goo,
das kiele Nass macht mi ganz fit.
Ych mergg es isch jetz wirgglig Zyt,
dass no e bitzli Äggtschen kunnt,
denn ab und zue dryb ychs gärn bunt:
Was wurdi s Rhybad besser mache,
wie könnti mes bim Schwumm lo krache?
Für Wasserschy bruucht me e Boot,
fürs Vollmondbad isches scho z‘schpoot
und vo de Brugge aabe z‘gumpe
isch so banal wie Schluuchboot pumpe -
und gföörlig isches no drzue,
es hett dört Schärbe mee als gnue!
Wie wärs mit Gleite schtatt mit Schpringe,
e Rutschbahn jä die könntis bringe:
Mit sanftem Schwung ins Wasser gleite,
verliebti Päärli rutsche z’zweite.
Wenn me die Bahn nur breit gnueg macht
und wenn dernäbe eine wacht,
sin Binggis au zum Schpass zueglo,
die ganz Familie ka druff go.
Dr Seppi kunnt mit Kind und Kegel,
e riise Plausch nid nur für Flegel.
Dr Opi Meier kunnt mit Hund,
e bitz Beewegig isch jo gsund.
D Frau Müller sitzt ganz gschpannt dernäbe
und gniesst das überdräyti Lääbe.
Dr Kevin dä rutscht Kopf voraa,
dr Pascal isch grad hindedraa
und dätscht em Kevin uffe Buggel,
es git drwääge e Geruggel.
D Anita zeig sich in voller Pracht -
was sone Badkleid doch ussmacht.
Dr Hansjörg, ganz e digge Bolle,
duet im Garacho aberolle.
Dr Rosi ire Rutschidanz
isch vo erwäälter Eleganz.
D Lorena kas aifach nid fasse,
s Bikini will und will nümm passe,
dr Wöschgang muess woll z‘warm gsi sy,
suscht giengt dr Hinter beschtens dry.
Mit Salto und ere Pirouette
platscht schwungvoll die glai Bernadette.
Dr Stefan wotts no besser mache
und raast durab wie nid ganz bache.
E mängge macht doch gärn dr Gloon;
das wird e riise Attraggzion!
Ych könnt dir no vyl mee verzelle;
die Rutscherei muesch dir vorschtelle.
Gäll, du wurdsch ys unterschtütze
es wurd dr nämmlig au seer nütze!
Mir wänn d Idee sofort lanciere,
e Petizion dien mir probiere.
Denn mir sin abonniert uff Schwung
als Glunggi und denn erscht no jung!

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 15. Hornig. oder 22. Merze am Nomidaag vom eins bis am vieri yyschrybe.
Usskunft: Jeannine Dähler, Tel. 076 580 32 22

De findsch ys au im Netz under www.glunggi.ch

Am Frytig 14. Merze vom halb zwai bis am fünfi und am Samschtig, 15. Merze vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle. Unsere Schtand isch an däm Samschtig in dr Freye Stroos

D Ladärnenusschtellig isch vom Mändig znacht, em 10. Merze bis am Mittwuch demorge, em 12. Merze uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.