Zeedel Jungi Garde 2013

Fasnacht 2013

Glunggi Logo

Fasnachtsclique Glunggi
Jungi Garde + Binggis

Wär zem Gugger isch dr Karl May?

E glaine Bueb in Saggse oobe
Hett gärn an wilde Gschichte gwoobe
Mit Helde, stargg und voller Muet
Am liebschte au vo eedlem Bluet
Vo guete, brave, tapfere Lüt
Wo kämpfe, doch si kriege nüt.

Dr Mueter hett das nid so basst
Är hett e mänge Gläbber gfasst
Doch tief in synere Seele inne
Hett är gwüsst, i ka numme gwinne
Die Gschichte sinn my hailig Loos
Vylicht wird ich als Dichter gross.

Doch laider kunnsch zu däre Zyt
Mit somene Bruefswunsch nid sehr wyt
E Ussbildig muess me düür erkaufe
E langi Lehrzyt au durlaufe
Und s‘hett nid soone Usswahl gää
Me hett halt miesse s’gängige nää

Wär Biecher mag, ka Lehrer sy
Drum isch dr Karli au scho gly
Zu emene brave Schulmaischter worde
Är hett probiert nid z’überborde
Het schön die Uffsätz korrigiert
Au wenn’s en schregglig enerviert.

Doch brav sy isch em Karl nid gää
Die schöni Uhr do muess är nää
Nur blöd isch die halt doch nid sy
Dr Zimmergnoss schreyt also gly
„me het mir aifach öbbis gschtoole“
Und d’Bolizey isch dr Karl go hoole.

Säggs Wuche isch är in dr Kischte gsässe
Sy Lehrerstell het är könne vergässe
Mit Jöbble haltet är sich über Wasser
Und merggt drby scho gly dass är
Mit Gschichte Gäld verdiene kaa
Doch längscht isch är kai gmachte Maa.

Die Phaase duurt no joorelang
Es wird aim drby angscht und bang
Denn um sy Hushaltskasse uffzpoliere
Duet dr Karli übere Haag schnabuliere
Immer wieder losst är öbbis verschwinde
Duet sich sy Lohn aifach erschwindle.

So isch‘s numme e Froog vo dr Zyt
Bis es gege ihn e Fahndig git
Und denne, es isch nid lang gange
Hänn si dr Karli könne fange
Und är hett lang ins Gfängnis miesse
Um syni Übeltate z’biesse.

Die Haft hett ihm nid schlächt byko
Wo si ihn denn hänn useglo
Isch är als Schryber bim Gfängnis bliibe
Het hunderti Fachuffsätz dört gschriibe
Doch s’Gaunere het är nonig loo
Und isch gly wieder in Knascht yne ko

So isch es joorelang wytergange
Är het sich erscht denn könne fange
Wo är in d’Haimet zrugg isch kehrt
Und syni Härkünft ändlig ehrt
Im glaine Ort vo synere Kindhait
Het s’Schrybe schliesslig schöni Frücht drait

Em Winnetou syni Abentüür
Wild Weschte typisch am Lagerfüür
Old Shatterhand und syni Kumpaane
Die Wäge ganz uss Holz und Plaane
All das het dr Karli für ys erfunde
Und z’letscht sy Glück denn au no gfunde.

Dass mir dr Karl als Süschee nämme
Das rymsch ganz aifach für di zämme
Vor hundert Joore isch är gschtorbe
Doch d’Fantasie isch unverdorbe
Bi syne Gschichte jung und wach
Sinn mir au jetzt ganz bi dr Sach.

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 23. Hornig. oder 2. Merze am Nomidaag vom zwai bis am vieri yyschrybe.
Usskumft: Jeannine Dähler, Tel. 076 580 32 22

De findsch ys au im Netz under www.glunggi.ch

Am Frytig 2. Merze vom halb zwai bis am fünfi und am Samschtig, 3. Merze vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle. Unsers Schtand isch an däm Samschtig an der Freie Strooss.

D Ladärnenusschtellig isch vom Mändig znacht, em 18. Hornig bis am Mittwuch demorge, em 20. Hornig uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.