Zeedel Jungi Garde 2012

Fasnacht 2012

Glunggi Logo

Fasnachtsclique Glunggi
Jungi Garde + Binggis

Mir schlumpfe schlumpfig schöön

Au mir hänn das Joor e Fusion
Mir laufe mit dr Schlumpf-Nazion
Si hänn e sichers Asyl sich gsuecht
Und drum by uns für d‘ Fasnacht buecht
Die drey Dääg sin die blaue Gschtalte
Bi uns am Mache und am Walte.

Dr Gargamel hett si fascht gfange
Drum sinn si halt in d‘ Färni gange
Und z’Basel sinn sy fündig worde
In all de goschdymierte Horde
Do könne sy sich guet verschlieffe
Und grad no d‘ Fasnachtskunscht verdieffe.

Em Schiggsaal miemer Dangge saage
Si sinn nid glandet uffem Waage
Und au nid uff e soone Schääse
Sinn si gange, die blaue Wääse
By uns hän si sich nidergloo
Mir sinn do drüber schampar froo.

Für uns isch das scho ideal
Mir sin e Grubbe in glainer Zaal
Do hilft e jeede mee scho fescht
Drum nämme mir si gärn, die Gescht
Erscht rächt wenn me se bruuche ka
Und hilfrych isch denn jeede Ma.

Dr Künschtlerschlumpf hets gly begriffe
Und grad em Larvemooler unter d‘ Arme griffe
Dr Dichterschlumpf, ich find das edel
Dä hilft mer mittem Fasnachtszeedel
Nur dumm isch, dass är Schlumpfisch schwätzt
Ich bi nid sicher ob das fätzt.

Dr Händy schafft am Requisit
Är isch im Baschtle superfit
Me hört en hämmere und sääge
Um kaini Driggs isch är verlääge
So kunnt e prächtigs Wägeli z‘ schtand
Mit däm spiile mir alli an d‘ Wand.

Und unsri tolli Goschdymierig
Gits unterem Beauty sinere Fiehrig
Är weiss doch schliesslig am allerbeschte
Wie s‘ ussgseh muess so ohni Weschte
Und wie mir mit de wysse Schtrümpf
E Gattig mache als falschi Schlümpf.

Am Änd vom Baschtelnomidaag
Do sorgt dr Kochschlumpf für e Gelaag
Me sotti numme d‘ Torte myde
Um nid en Explosion z’ erlyde
Dr Pägglischlumpf isch in dr Nöchi
Syni Überraschige göhn gärn in d‘ Höchi.

Bim Vordraab vorne isch d‘ Schlumpfine
Si basst guet in dä Huffe yne
Und zaigt de Kinder elegant
Wie Zeedel gisch de Lüt in d’ Hand
Und wie me Stäggelampe drait
Isch em Sportlerschlumpf e Glainigkait.

Dr Papa Schlumpf ka‘ s nid lo sy
Är schafft‘ s - das isch die rainscht Magie
Dass d‘ Drummle glänze in voller Pracht
So gfallts ys, wenns denn dätscht und kracht
Und d‘ Piccolo wie ai Doon klinge
No prächtiger als jedes Singe.

Mit Hilf vo unsre Fasnachtsgescht
Drey Dääg lang zaige mir nur s‘ Bescht
Und under uns, als bsunderi Trümpf
Gsehsch, wenn gnau luegsch, die ächte Schlümpf
Si sitze uffem Requisit
D‘ Latärne drait no vyl mee mit.

Mir sinn schtolz, mir Glunggi-Junge
Dä Coup dä isch ys wirgglig glunge
Si isch willkomme, die Verschterggig
Doch gschtattet mir no die Bemerggig
Mee Noochwuggs isch trotzdäm erwünscht
Denn d‘ Schlümpf mit irne Zauberkünscht
Sinn nur das Joor bi uns derby
Im näggschte miemer mee Aigeni sy.

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 8 Johr, wo wänn lehre drummle oder pfyffe, könne sich dört am Samschdig, 3. Merze. oder 10. Merze am Nomidaag vom zwai bis am vieri yyschrybe.
Usskumft: Muriel Dolder, Tel. 061 902 02 23

De findsch ys au im Netz under www.glunggi.ch

Am Frytig 2. Merze vom halb zwai bis am fünfi und am Samschtig, 3. Merze vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle. Unsers Schtand isch an däm Samschtig an der Freie Strooss.

D Ladärnenusschtellig isch vom Mändig znacht, em 27. Hornig bis am Mittwuch demorge, em 25. Hornig uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.