Zeedel Jungi Garde 2011

Fasnacht 2011

Glunggi Logo

Fasnachtsclique Glunggi
Jungi Garde + Binggis

Fasnachts-Kaleidoskop - Zämme gits e farbig Bild

Als Clique dörfsch es nid lutt saage
mir wäre gärn e Waggis-Waage
sitt Joor und Daag als Schpiil uff dr Gass
das macht ys halt nümm so vyl Schpass
s wird Zyt, mir kömme uss däm Trott
e Wäggsel wämmer ha, by Gott.

Dr Inschtruggder isch e liebe Maa
nur schträngt er jewyls grausam aa
"Die Schlepp und Fünfer, die mien ko"
me wurd am liebschte haime goo;
"Au Schtai ablaade darf nid sy!"
ach wär die Schtund doch gly vrby.

E Waage z'ha das wär so schöön
ringsum die heere Fasnachtsdöön
und doch nid immer iebe miesse
nur gmietlig die drey Dääg voll gniesse
E bitz vom Waage aabeschreye
und Gschängg in d'Mängi ynegheye.

E Maitli schtopfe bis zum Höösli
si griegt drfür drey rooti Röösli
dr alte Frau e Hampfle Riebli
und nid z'vergässe das glai Biebli
das griegt zwai Glugger und no Dääfi
vor lutter Freud wills grad uffs Hääfi.

Am Oobe all die Bängg go loose
schtatt wyter dr Arabi bloose
in Rueh d'Ladärne no go bschaue
vylicht e bitz über d'Sträng no haue
das ka me sich als Waggis gschtatte
am Nomidaag erscht muesses patte.

Es gäbt no andri Variante
zum Byschbyl mit dr alte Tante
liesst sichs ganz heerlig intrigiere
me könnt scharmant e bitz verfiere
das grobe Waggis-Gschrey und Gheuel
wird z'lescht mir scho e bitz e Greuel.

S fynere isch meh mi Sach
es goht mr nid so umme Krach
wo d'Waggis maischtens produziere
y wurd nur gärn mee ussbrobiere
was d'Fasnachtswält no zue wurd loo
und Waagewaggis könnte goo.

Isch nämmlig dr Cortège fertig gmacht
dr Waage guet versorgt für d'Nacht
denn könnt me e zwaits Lääbe haa
als Wäägeler goht das nääbedra.
Wenn d' Clique d Nacht lang wyter gässle
kasch guet als Waggis umme schpässle.

Zem Byschbil könntisch Bängg go singe
E Gugge-Xylophon lo klinge
zur Noot bim Comité mitdue
die hän am Oobe sicher Rue
D Frau Fasnacht het no mängi Gsichter,
was s Beschte isch, das sait kai Richter.

Die Vylfalt macht mi ganz konfus
y glaub ich halt mi lieber drus
und blib grad bi mym Piccolo
die Märsch die stimme mi so froh
und Triller sind doch z'letscht kai Sach
das hoche G diräggt my Fach.

Wenn me sichs lenger überleggt
mi Beruefig hani scho entdeggt
Em Spiil ghör ych mit Freude aa
da Draum vo anderem darf y ha
so lang me ains nie duet vergässe
nur passiv wird nid umme gsässe!

Und Du, blyb nid am Stroosserand
kumm mit, y nimm Di grad an d Hand
wotsch nid by uns ko pfyffe leere
dr Drummlergaischt mit uns verehre?
Als Kind und Teenie bisch drby
s' näggscht Joor darfsch au e Glunggi sy.

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 19.Merze oder 29. Merze am Nomidaag vo zwai bis vieri yyschrybe.
Usskunft: Muriel Dolder, Tel. 061 902 02 23

De findsch ys au im Netz under www.glunggi.ch

Am Frytig 18. Merze vom halber zwai bis am fünfi und am Samschtig, 19. Merze vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 14. Merze bis am Mittwuch demorge, em 16. Merze uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.