Zeedel Jungi Garde 2010

Fasnacht 2010

Glunggi Logo

Fasnachtsclique Glunggi
Jungi Garde + Binggis

Q4U Experimänt

Mir sin soziaali Kreatuure
und wänn gärn Sorg gäh naimeduure
für d'Umwält und für andri Wääse
das kasch au in dr Zyttig lääse.
Au ych bi do nid anderscht gschtriggt
das hani mittlerwyl erliggt.

Nur bini halt so ganz ellai
y ha kai Frau und Kind dehai
s'git niemerts, wo mr nöcher stoht
für dä my Härzli schnäller schloot.
Eso darfs wirgligg nümme blyybe
wär duet my Ainsamkeit vertryybe?

So richtig willi my nid binde
nur glägendligi Gsellschaft finde
nid mini Freyhait ganz uffgää
doch gwüssi Pflichte übernäh.
E Paateschaft wär ideal
fürs Göttikind noch mynere Wahl.

Do lueg y grad im Internet
ebbs naime Kandidaate het
am liebschte in dr Schwyz diräggt
Nid sone Drittwält-Hilfsprojäggt
wo sich d'Beziehig druff beschränggt
dass me ans Überwyyse dänggt.

Es git zahlryychi Variante
für Schöflifründ und Gaissetante
au Rinder sin im Aagebot
es find e jeede was er wott.
Dra z'dängge losst mr drum kai Rue
ych wird jetz Götti vonere Kue!

Am Samschtig hau ych's ab in d'Alpe
wird vo aim Hoof zum andere tschalpe
bis dass ych das spezielle Rind
für mini Paateschaft au find.
E Kälbli mit ganz waichem Fäll
am liebschte wyss oder sehr häll.

Ych wird das Dierli hüffig bsueche
bring ihm zum Burzeldaag e Kueche
doch halt ‑ ych ha jo ganz vergässe
dass Kälbli gar kai Kueche frässe.
E Stryssli darf drfür scho syy
mit Greesli, gwaggse a mym Rhy.

Bim Alpuffzug dr prächtig Kranz
und uff dr Alp dr erschti Danz
sin zwyfelloos my Göttipflicht
an däres'mr bylaib nid bricht.
Au wird ych ganz persönlig sorge
für beschti Senne, umsverworge!

Hüür wird my d'Adria vermisse
my Zält duen ych am Alpstock hisse
emol für d'Feerie nid in d'Färni
nai, ab zu Göttikue und Bärni
mit frohem Muet kääs ych denn mit
und halt my mit Ussmischte fit.

E soone Summer dörft nie ände
doch han ych's nid in mine Hände:
wenn d'Ööbe friehner dunggel wärde
und s‘ Dorf im Daal rieft noch dr Härde
Denn haisst für immer Abschiid nä
my Kue wird denn zum Metzger gä.

E näggschts Mol wird my Göttikind
mit Sicherhait kai Schlachterrind
e Milchkue dörfti‘s numme sy
wo nicht verwurschtet wird so gly
Denn jedes Joor dä Trennigsschmärz
isch z'vyl für my zarts Göttihärz.

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 19.Merze oder 29. Merze am Nomidaag vo zwai bis vieri yyschrybe.
Usskunft: Muriel Dolder, Tel. 061 902 02 23

De findsch ys au im Netz under www.glunggi.ch

Am Frytig 26. Februar vom halb zwai bis am fünfi und am Samschtig, 22. Februar vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 22. Februar bis am Mittwuch demorge, em 24. Februar uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.