Zeedel Jungi Garde 2009

Fasnacht 2009

Glunggi Logo

Fasnachtsclique Glunggi
Jungi Garde + Binggis

Dr lengschti Daag

E Fuessball-EM in unserer Schtadt
Dr Blatter maint, das wird sicher glatt.
Beruet sini Freud nid meh uff Kalküül?
Mir jedefalls gsehn mit gmischtere Gfüül
Däm grosse Unternääme entgääge
So Hooligan sin doch maischt kai Sääge
Vyl Lärm und Drägg und Ärger drzue
Do hätte mir lieber unseri Rue.

Nid weenigi plane e guets Exiil
E sichere Fluchtort, wird s wirgglig zvyyl.
Und wär im Gschäft kai Feerie griegt
Luegt wien är gschiggt ums Gwiehl ummebiegt.
Die z Muttenz im Freydorf hänn gar kei Wahl
Dr Wääg zur Arbet und haim wird e Qual
Die ganzi Geegend sicher abgschlosse
Do hetts doch aim ains ins Hirni gschosse!

D' Logischtigger ryybe sich seelig d'Händ
Nid nur im Sicherhaitsdepartemänt
Sogar d Bolizei het Versterggig gsuecht
Nid nur uss dr Schwiiz, au Schwoobe sinn buecht
Und s Schällemätteli wird wieder Knascht
Für Ärgerbrieder die passendi Rascht,
Bevor denn s Sonder-Ussschaffigsgricht
Dr Schtaab über sottigi Kärli bricht.

Bi däne Vorkehrige wird mir bang
D Idee liggt nooch - am beschte ich gang
Denn kaani au grad mi Wohnig vermiete
An jeede, wo mir nur gnueg duet biete
So haani au e bitzli e Gwinn
Wie die mit ökonoomischem Sinn
No schnäll e Camping in Garte schtelle
Und nochem Ändschpil ihr Gäld dien zelle.

Denn hett die EURO ändlig aagfange
Für d Nati hämmer nid lang miesse bange
D Schlacht vo Sankt Jakob, e Seeschlacht dismol
Bringt is uff d Suechi noch neue Idool
Do kunnt die orangschi Wälle grad rächt
Die Holländer sin villicht nid so schlächt
D Fäns jedefalls sinn meischterhaft toll
Stürme in Horde dr Schwizer Zoll.

Bärn schwimmt scho lang im orangsche Meer
Die Invasion kunnt niemerem quer
E friedlige Huffe, unkompliziert
Gmeinsam begeischteret, aber nid gfiert.
Si reihe sich yy in e grosse Fluss
Und trotzdäm schticht schtändig e Detail druss
Mit Goschdüm und Hiet uss Haimproduggtion
Git jeede däm Zuug si eigene Doon.

Bim Marsch wo zum Schtadion uuse fiehrt
Wird glacht und au danzt, aber nid blagiert
D Begäischterig isch für alli offe
E mänge Basler isch do mitgloffe
Und isch uff aimol zum Holländer worde
Zum Mitglied vo däre orangsche Horde
Wo – wenn si root gseht – nid ussraschte duet
Im Gägedail sich am Boode ussrueht.

Die Holländer sinn ganz bsunderi Lüt
Zum Feschte bruuche die aigentlig nüt
E Sieg vo dr Mannschaft wär zwar scho toll
Doch au nochem Ussschaide ischs no voll
Es git zwar e kurze Katzejammer
Denn fyyre si witter, s isch dr Hammer!
Und freue sich für die, wo no sinn drby,
Eso sötte alli Fuessball-Fän sy.

Si hett ys aagschteggt, die gueti Luune
Mir ghööre au zu däre Kommune
Dr Unterschid isch jo schliesslig nid gross
Au mir an dr Fasnacht sinn uff dr Schtross
hänn Goschdüm und ziehn so im Cortège mit
mit Wääge und andere Requisit,
wänn fröhlig syy und zämme feschte
und nid nur juuble für die Beschte.

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 7.Merze oder 14. Merze am Nomidaag vo zwai bis vieri yyschrybe.
Usskunft: Muriel Dolder, Tel. 061 902 02 23

De findsch ys au im Netz under www.glunggi.ch

Am Frytig 6. Merze vom halb zwai bis am fünfi und am Samschtig, 7. Merze vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 2. Merze bis am Mittwuch demorge, em 4. Merze uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.