Zeedel Jungi Garde 2008

Fasnacht 2008

Glunggi Logo

Fasnachtsclique Glunggi
Jungi Garde + Binggis

Simpson-Manie und mir sin drby

E gääli Wälle schwabbt über is y
vo jung bis alt sin alli drby
dr Simpson-Waan het Basel am Schopf
nur ych Zeedelschryber, ych arme Dropf
ha gar kai Aanig und mues drno
die ganzi Serie zu mir hai lo ko
denn het me vom Thema kai blasse Dunscht
no ischs nid wyt här mit dr Dichterkunscht.

Schtatt Gutzeli bache duen ych jetz halt
DVD luege und mergg drby bald
Da Simpson-Comic isch gar nid so schlächt
Är wird dr Wirgglichkeit ämel gerächt.
E Family wie ussem Bilderbuech
Me hätt se am liebschte dääglig uff Bsuech
Und s Bescht: mit emene Knöpflidrugg
schiggt me se eifach in Äther zrugg.

Dr Vatter, dr Homer, isch sehr bequääm
dringgt oft e baar Bierli meh als genääm,
und wenn är e gueti Idee glaubt z'ha
isch sicher e riisige Hoogge dra.
Im Kraftwärgg bim Schaffe do versait är
s Päch isch maischtens si treue Begleiter.
Wär das en ächts und reals AKW
wär d'Wält lengscht am Änd, o jee minee.

Me kas em Homer nid übel nä
är isch halt eso, me muess em vergä.
Au wenn sich d Marge dodrmit schwär duet
si hebt zu däm Maa und das isch guet.
Die drei glaine Kinder het si im Griff
länggt sicher und redlig das Simpson-Schiff.
Als Mamme sorgt d Marge für Ornig und Rue
Moral und Aastand au no drzue.

Bim Bart isch d Erziehig oft vergääbe
Schtreich und Schpässli sinn halt si Lääbe
är meints zwor meischtens nid wirgglig bös
doch für si Umfäld wird’s ruinös.
Dr schuelischi Stoff isch nid so si Sach
drum hett är hüffig mit Lehrer Krach
was dodrzue fiehrt dass är allewyl
Stroofuffzgi griegt, und zwor denn no vyl.

D Lisa Simpson spilt Sax mit Bravour
allerdings mee in Moll als in Dur;
dass si so schlau isch das biesst si halt
mit Melancholie in aller Gwalt.
Altklueghait schafft nid immer Fründe
erscht rächt nid, wenn mes no duet verkünde.
Me frogt sich scho wie das Maitli do
uss sonere Sippe ka use ko.

Vom Näschthööggli Maggie ghöört me nid vyl
si suggelet Nuggi allewyl.
Doch sottsch das Buschi nid unterschetze
d Maggie ka ihri Akzänt scho setze
im Schtrampler krabblet si ohni Wort
und wenn me se bruucht, denn isch si am Ort
es het drum scho mänge Kriminelle
gleehrt: uff das Kindli muess me zelle.

Noch langem Schtudium vo däre Gschicht
Kumm ych zur wohlüberlegte Ysicht
Zwoor sin die Simpsons mäischtens rächt doof
doch zaigt sich au oft dr glai Philosoph.
S Aigeninträsse liggt allne nid färn
doch hän si sich alli wirgglig sehr gärn
So wird uss Chaos mit Garantie
Am Ändi vom Daag e Harmonie.

Dr Alldaag isch e schtändigi Gfoor
doch d Simpsons lääbe n ys dääglig vor:
s isch glych wenn öbbis in d Hoose goot
so lang me zämme hebt ischs nid z schpoot
e Usswääg findet sich allewyl
gmeinsam erreicht me soo jedes Zyl.
Das Glunggi-Suschee söll drum bewyse
Gemeinsamkeit isch au unsri Devyse.

Dr Glunggi-Käller isch an dr Bäumligass 7 (Yygang Bluemelaade). Maitli und Buebe ab 7 Johr, wo wänn lehre drummle oder pfyffe, könne sich dört am Samschdig, 16. Februar oder 23. Februar am Nomidaag vo zwai bis vieri yyschrybe.
Usskunft: Muriel Dolder, Tel. 061 902 02 23

De findsch ys au im Netz under www.glunggi.ch

Am Frytig 15. Februar vom halb zwai bis am fünfi und am Samschtig, 16. Februar vom elfi bis halb fünfi dien sich usserdäm alli Junge Garde uff em Barfi em interessierte Publikum vorschtelle.

D Ladärnenusschtellig isch vom Mändig znacht, em 11. Februar bis am Mittwuch demorge, em 13. Februar uff em Münschterblatz. Dört ka me übrigens au alli Zeedel und Schnitzelbängg, d' Blaggedde und dr Rädäbäng kaufe. Mr freue ys uff Ihre Bsuech.