Zeedel Jungi Garde 2015

Schnitzelbank Intärns 2016

Friener bin y als Glopfgaischt koo
Jetz bin y als Hemmliglunggi doo
Aigentlig wär ich jo froh
Es wurde Jüngeri do oobe stoo
Denn könnt y au do unde sitze
Aine nää und lache, das wär Spitze

Noochwuggs bruuchts nid nur zem drummle und pfyffe
Au zem d Raim vo Schnitzelbängg und Zeedel z schlyffe


D Amelia schwingt dr Stägge, wie wenn nyt wär
Und findet dä Tschobb gar nid so schwär
Me beachtet si, das duet ihre basse
Nur s Comité wurd si am liebschte schasse
Dä blöödi Bääse will y gar nid ummedraage
Verfuule sell er uff em Requisitewaage

Si sait, das goot gar nid, dass an dr Fasnacht
S Comité aim romantischi Avance macht
Dir Junge dien d Larve sälber kaschiere
Baschtle und mit Lyym ummeschmiere
Dasch nid so aifach, wie me dänggt
Em Robin hett das Lyyme glänggt
Hett d Naase nid an d Larve bäbbt
Stattdesse grad in Gipskopf gläbbt

Robin, verwäggsle nie e Larve mit eme Gipskopf
Mit däre aagläbbte Naase wärsch en arme Tropf


Au s Requisit, das wird sälber gmacht
Nadyrlig au bemoolt, das wär jo glacht
Dr Pascal und Robin dien bsunders flyssig moole
Dien wirgglig alles uss sich uusehoole
Au ihri Gsicht sinn gmoolt, jetz waiss y nid,
Gheere die em Änd au zem Requisit?

Mit däne gmoolte Gsichter, s isch zem lache
Goosch lieber in e Gugge go Fasnacht mache
Mir hänn Dambuure, die dien brilliere
Sinn Schwyzermaischter im Schlegel fiehre
Aber sunnsch, y waiss nid so rächt
Im Sport, do sinn si eher schlächt
Im Schutte, schifaare oder aifach soo
Mir hänn zvyl Gnöche, wo leen lo goo

Wenn me nid als Pfyffergrubbe laufe wott
Bruuche d Dambuure jetz e Schifaarverbott


Kunnt d Meo gly, oder scho wider z spoot
Jeede Zyschdig s glyych, mir wüsse wie s goot
Mir mien vo dr Schuel grad haimesause
D Flööte pagge, und denn do aanebrause
Denn warte, warte, warte mir uff d Inschtruggdoore
Die sinn im Stau, oder hänn ihri Uhr verloore

Als Pfyffer-Aafänger bruuchsch nid nur bim pfyffe Geduld
Eso wird jedes Kind zem Glunggi, und mir sinn sälber schuld
S gitt soonigi, die gheere sich gärn schwätze
Bim Xavier, do grootisch sicher nid an Lätze
Blabbere, kommandiere und korrigiere
Waiss alles besser und wills au duurestiere
Drum isch är als „Herr Lehrer“ bekannt
Ob är im drummle au brilliert, do sinn mir gspannt

E sone Blabbertriine ka luschtig oder närvig sy
Ibertrybs nid und blyb luschtig, denn bisch drby


Unsri Jubelkommission, die isch hyperaggtiv
Sammlet Stitz fir s Juuble, zimmlig agressiv
Bim Sponsoorelauf mien alli zämme brenne
Und alli mien vyl schaffe, s isch zem flenne
Jetz isch Jubeljoor, jä was isch do so toll
Denn my Kaländer isch scho ganz voll

Mit all däne Jubelaggdivideete mues y go sueche
Wenn dass y no e Wuche find zem Feerie bueche
S isch zäh Joor häär, do hett my Soon
Moodisch glaidet und ussgsee wie ne Gloon
Die Mode, die isch scho längscht verbyy
Aber no lang isch är so aagleggt gsyy
D Hoose ganz wyt unde, de glaubsch es nit
Dr Robin und Pascal mache‘s hütte no mit

Die zwai maine: wär schwätzt do vo Moode, das isch Stiil
Ich sag: e Schiss in de Hoose isch schynbar e Lääbesgfyyl


E Glunggi Wuchenänd isch e Riisesach
Ganz ohni Eltere, das macht Spass
Z Oobe denn goots erscht richtig loos
Uff de Better gumpe, spiile,schnäädere, dasch famoos
Und isch die langi Nacht denn ändlig verbyy
Schloofe si halt bim Zmorgenässe yy

Bim Abhoole vo ihrne Sprössling maine d Eltere haiter
Wär isch do mieder, my Kind oder emänd doch dr Laiter
Y verstand Di nid, nai je ne comprends rien
Was willsch mer saage - nom de chien
Begreifst Du nicht ce que tu dois faire
Du weissts genau, verzell mir kai Määr
Dasch nid dr Turm vo Babyloon
Dasch d Meo als Pfyfferstunde-Gloon

Bi de Glunggi isch Integrazioon scho ganz normaal
Aber sag mol Nunnefirzli uff Franzeesisch, s isch e Quaal


Die Junge koche fir die Grosse
Maade, Unkrut, Bluet und Eitersosse
Vergammleti Öpfel wärde serviert
Au die mit Gallesosse verziert
Dasch nid nur Gruuselfrass an Hällowyyn
Fir d Lili isch das Alldaags-Medizyyn

Wenn d Lili als Studäntin duet seziere
Duet si alls grad au no degüschtiere
Wenn die Junge fir die Grosse koche
Wänn si nid die ganzi Zyt maloche
Hygienebeutel ka me doch e bitz mutiere
Und zu Wasserballöön umfunggzioniere
So macht Schyssibutze vyyl mehr Spass
Hauptsach, am Schluss sinn alli nass

Das gschwemmti Herrekloo als Schlyffi isch e Hit
Em Flurin steert das bim baade in däre Suppe nid


Dr Drummelimarsch isch ganz e spezielle
E huffe Märsch in Aim, was soll y no verzelle
Mir hänn dä flyssig g‘iebt, jetz sitzt er guet
Dir wärdet gly mol gheere wie dä deene duet
Doch spiilsch die Märsch denn ainzeln duure
Bisch duurenand mit Värs und fliegsch uff d Schnuure

Im Glunggiläum isch dä Värssalaat jo guet und rächt
An dr Fasnacht wirds mir vo däm Salaat no schlächt