Gschicht

E weneli uus dr GLUNGGI-Gschicht!

Grad no de Fasnachts-Daage hänn sich e paar aagfrässeni Fasnächtler troffe und e huffe Gedangge fir e neyi Glygge zämmedrait, e paar sin vo de Optimischte gsi und e paar Wildi sin drzuekoo. S’isch gar nit aifach gsi, me hett miesse immer wiider uff aine warte und em Letschte hett denn ebber lutt «GLUNGGI» gsait; dr Namme hett grad gfalle, und isch au bliibe. Am 3. Merze 1966 hett me denne d’Fasnachts-Clique Glunggi grindet.

1967, an dr erschte Fasnacht, isch’s no e glaini Grubbe gsi; aber scho e Spiil, wo me hett kenne zueloose. Au e Vortraab hett’s ka, aber e Glygge-Lampe hett me sich nonig kenne laischte. Im näggschte Joohr hett me denn e Lampe uus Lampion gmacht, s’hett zem Sujet passt und erscht no wenig koschtet. Drfir hän d’Glunggi e grandioses Requisit noochezooge.

S’Joohr druff sin d’Glunggi denne fascht wie e rächti Glygge uff d’Strooss, mit ere heerlig gmoolte Lampe. Joohr fir Joohr sin d’Glunggi gwaggse, meh Vorträäbler, meh Pfyffer und meh Drummler. Au d’Goschtym hän immer meh Farbe und Witz bikoo und au dr Zeedel hett gfalle. 1971 hett denne s’Brigitte Ritter d’Lampe gmoolt, e groosse Sprung in d’Fasnachtswält isch glunge.

D’Glygge isch greesser worde, und so hänn am Morgestraich 1974 au alli e aige Kopflatärnli bikoo; e glaine Waggis wo uff eme Stai sitzt und e Stäggelampe hebt. S’isch e bsundere Augebligg gsi, s’isch in Erinnerig bliibe. Natyrlig hän denne au gly neyi Stäggelampe aane miesse. Vo doo aa isch dr Vortraab mit vyl Stolz uff d’Gass.

1977 hett denne dr Roger Magne zem erschte mool d’Larve gmacht und s’Joohr druff au d’Latärne. Das hett e langi Zyt ängschter, fasnächtliger Verbundehait gää. Und grad in däre Zyt isch e Ybruch koo, und d’Glygge hett sich miesse bewäähre. Mir wäre aigetlig Stamm worde, doch grad hänn d’Vorschrifte vom Comité gänderet; mir sin e B-Glygge worde (hitte wisse nimme vyl in dr Fasnachtswält was das aigetlig gsi isch).

S’hett em Waggstum vo de Glunggi aber kai Abbruch doo, me isch greesser worde und me hett sogar 1979 e Jungi Garde grindet. Die Jung Garde isch s’Joohr druff s’erscht mool an dr Fasnacht gloffe, und denn no wie. E heerlige Zuug hett me kenne luege.

1981 hän d’Glunggi an dr Grälligerstrooss dr Glunggi-Käller fertig baut und ygrichtet. Me hett derte pfyffe und im e Schuelhuus drummlet, aber die gmietlige Aaläss sinn mänggmool bis in Morge yyne gange. E bsunder Joohr isch au 1985 gsi, do hänn die Grosse und die Glaine emole zämme Fasnacht gmacht.

In de näggschte Joohre sinn d’Glunggi stargg und grooss worde, eso isch me denne au 1990 zem erschte mool als Stamm-Glygge gloffe. Gfeschtigt und mit ere groosse Hampfle Humor, hett me denne au gly an e greessere Glygge-Käller miesse dängge. Scho s’Joohr druff hett me derfe in dr Baimligass in neye Glunggi-Käller yzieh; e heerlige Käller isch’s worde und isch hitte no e Bijou fir jede Glunggi. Do ka me sogar zämme pfyffe und zämme drummle und natyrlig e jede Aaloss vo Härze gniesse.

Grad zämme mit dr Jubelfyr – 25 Joohr Glunggi – hett me au dr erscht Drummeli-Ufftritt im Kiechli kenne gniesse, e unvergässligi Zyt. Au d’Jubelfasnacht 1991 isch in d’Gschicht ygange und mit eme heerlige Jubelzuug isch me dur d’Stroosse gloffe.

D’Glunggi hänn ihre Platz in dr Fasnachtswält gfunde und bis hitte mit vyl Aigelaischtig und Humor bhalte. Die Jung Garde hett e Binggis-Grubbe bikoo und hitte lauft au e Alti Garde, wo beachtlig guet d’Fasnacht duet zelebriere. Eso isch die ganz Glunggi-Familie mit Härz und Seel am fasnächtlige Tryybe drby, nai ich main, mit Begaischterig drby! und das nit numme an de drey scheenschte Dääg.