Dambourebummel 2014

Flandererundfahrt

Damboure 22.-24. Auguscht 2014

01_eap

Dr Hiflug

D'Damboure vo de Glunggi hänn emole welle e Bier-Kultur-Rais uf Belgie mache. Am Donschtig zoobe sinn äntlig alli Termin beschtätigt und s'definitive Brogramm verschiggt gsi, do hett d'Rebecca vom Stucki zem Gligg gmerggt, ass dr Flug uff em Boardingpass 10 Minute friener aagsait isch als uff em Biljee und im Brogramm stooht.

Dangg WhatsApp, SMS und andere modärne Hälferli hett's denne doch alle am Frittig demorge am Sibeni in Flughafe glängt, zem derte heere, ass dr Flieger e Halbstund verspeetet isch. No dr gweenlige Täsche, Schue- und Soggekontrolle, wo mir dangg em Raphi sym grosszigige Opfer vomme halbe Liter Schampo hail iberstande hänn, hett denn dä Turboprop-Rumpelkaschte dr Wäg uff Brüssel under d'Fligel gno.

Uff em Nationaal Luchthaven hett uns dr Rolf als halbe Belgier zielsträbig zem rächte Gepäggband gfiert — laider hett das em Rolli sy Koffer nid gwisst und isch uff em Rollfäld schtooh blibe wien Eelgötz. So sinn denne die mit vollständigem Gepägg schon emol voruss uf Leuven und derte hett's sy in die erschtbeschti Baiz ynezoge zem d'Wartezytt uff dr Räschte mit zwai Bier aabe z'schpiele. Zämme mit dr Verspeetig vom Flug hett halt denn d'Biertour dur Leuven uff Trottinett ohni Mittagässe aagfange, aber lutt Jenni sinn drey Bier au e Moolzytt und zwai hämmer jo gha.

02_turbo_prop

Dr Fryttig

03_erschti_baiz
04_trotti

Noch ere lengere Yfierig dur unsere Guide mit vyle Hiwys, was do alles s'Beschte vo Belgie und drumm vo dr Wält isch, simmer denne äntlig mit unsere Trotti losgfahre. S'het denn in dr Baiz vo de Bierbrauer e Versüecherli gäh, aber allewyl no nytt z'ässe. Uff em Wäg Richtig Altstadt isch dr Hampe ohni z'Midaagässe eso schwach worde, ass en s'Trotti abgworfe hett.

05_oude_markt
06_domus

An dr lengschte Theke vo dr Wält uff em Oude Markt hett's denn widr e Bier, aber allewyl no nytt z'Ässe gäh. Will s'isch ko rägne, het dr Guide am Schärme langsamer statt schnäller gmacht. Mer hänn en denn äntlig eso wytt gha, ass mer rasch ins Restaurant vo dr Brauerei Domus — wo ähnlig wie d'Fischerstube e Baiz mit Glaibrauerei isch — disloziert sinn. Uff em nasse Boode hett me zwor elegant mit de Trotti kenne slide, aber weniger Hunger hett das au nid gäh.

07_domus

In dr Brauerei hett s'denn ghaisse, me kenni jetzt nytt ässe, d'Fiehrig syg an en anderi Gruppe bunde. Zem Gligg hänn sälli die Fiehrig uf flämisch welle, denn simmer am Vieri doch no zem Zmidaag ko. Mer hänn denne schlussändlig die Fiehrig sy loh und drfir s'Bier gnosse. Unsere Guide hett's aber pletzlig doch pressant gha, will är am Fimfi hett welle zrugg sy und no e Termin gha het. Laider het är druff beschtande, ass mir die Trottinet widr an Ussgangspunkt zruggfahre. Mer hän brobiert, zwai Kombitaxi z'bschtelle zem sy ibereschigge, aber dr Wille, ebbis z'verkaufe, hett amme e bitz gfählt. Also hämmer uf dr Tour de Flandre e Sprint miese yyleege und sinn im Rääge zem Haafe ibere gflitzt. Au wenn mir an jedem Egge aine hänn lo stooh, drmit die Langsamere d'Abzwygige nid verbasse, hett's ainewäg nytt gnutzt. Schliesslig sinn aber alli ans Ziil ko, wenn au zem Dail uff Umwäg.

Nonem Spaziergang zrugg in Schtadt isch denn e gmietlige Apéro uff em Grote Markt aagsait gsi mit zwai, drey verschidene Bier, bis es Zytt gsi isch, zem e Baiz sueche. Mer hänn en Empfählig gha, aber laider kai Beschtätigung vo dr Reservation. Mit e Bitz verhandle mit em Capo — s'isch en italiänischi Baiz gsi — hett's denn glych Blatz gha bis am halber nyni. Laider hett denne d'Bedienig bi aim Disch d'Kurve zwische der Vorschpyys und em Hauptgang nid rächt griegt. Drumm hänn e baar no uff e Dessert gwartet, wo sy unseri Blätz am halber Nyni scho widr hänn welle verkaufe. Sy hänn uns denne en andere Disch fir a halb Stund aabotte. Do sinn aber nid alli yyverschtande gsi. Uff jede Fall hänn sich gly das druff aabe d'Emozione an dr lengschte Theke widr beruhigt und s'isch e lange Oobe worde.

08_boon_chimay
11_ussgang
09_ussgang
10_ussgang

Dr Stucki hätt no fascht e Gorilla vor dr Baiz usenander gno, aber mir sinn jo fridligi Lytt. Es hett sonigi gäh, wo am Schluss dr aigetlig kurzi Wäg zem Hotel mit em Taxi under d'Reeder gnoh, aber nid realisiert hänn, ass es z'Leuven meh als ai Hotel IBIS gitt. Das hett denn im Jenni dr Ussgang massiv verlengeret.

Dr Samschtig

Am näggschte Morge isch am Zähni unser Büssli mit Schofför barat gschtande und wider Erwarte au alli Damboure. Dure Schtau uff em Ring um Brüssel simmer denn doch grad pingglig bi dr Brauerei Boon z'Lembeek yydroffe. Derte hett unsere Guide, e pensonierti Dame, uff uns gwartet und uns in d'Ghaimnis vo Geuze, Kriek und ihrem Handtäschli yygweyht. Ydrigglig sinn vor allem die vyyle, grosse Holzfässer gsi.

12_boon
13_boon

S'Fruchtbier zem brobiere isch den durzooge aako und dr Raphi hett's gar nid verdrait.

14_boon
15_antwerpen

Mit em Büssli isch es denne wytter Richtig Gent gange. Laider hett unsere Haizer am Styyr, wo vo irgendwo öschtlig vo dr Oder-Neisse-Linje ko isch, wägere Bauschtell die lätzi Abfahrt gno. Drum sinn mer widr in Schtau gfahre. Mer hänn en denn drvo erleest, wytterhy im Schritttämpo rund um Gent dr Wäg z'sueche. Mir hänn uns gsait, lieber statt in zwai Schtedt zweni Zytt aini drvo besser aaluge. Drum simmer zrugg uff d'Autibahn und diräggt Richtig Antwärpe gfahre. Drmit aber nid s'glych bassiert wie am Frittig, simmer halt denn in e Raschtstette ebbis Glains oder Gressers go pigge, kai kulinarischi Highlight, aber s'hett besser satt gmacht als em Jenni syni drey Bier vom Vordaag.

Z'Antwärpe hett's denn e gmietlige Stadtbummel mit Zwischehält zem Tangge gäh. Drno simmer im Källergwölb vom Restaurant Pelgrom guet go Znacht ässe. Uff dr Ruggfahrt uff Leuven hänn die Maischte gschloofe. Kurz vor Leuven simmer tatsächlig znacht am Elfi s'dritti Mol an däm Daag in e Schtau ko!
Z'Leuven hett's ghaisse: Ab an die lengschti Theke mit Open End.

Sunntig

Am Sunntigmorge hänn die Maischte dr Ussgang vom Wuchenändi in de Knoche oder villicht au im Kopf gha. Es isch dyttlig schtiller gsi. Aber z'Brüssel het dr Hanspi afo uffdrille — e riise Lauf. D'Zytt isch mit Waffle, Fritt, Drachefuetter kaufe und Bier im Kaffi Delirium rasch ummegange und mir hänn im Flughafe uff dr Flieger gwartet.

Do hämmer miesse luege, ass dr Hampe und dr Stucki vor lutter Bier bschtelle nid s'Boarding verbasse. Noch kurze 50 Minute schloofe simmer z'Basel glandet und hänn derte e gweenligs Fäldschlessli im Plasticbächer zem vierfache Bris wie z'Belgie griegt. Noch däre Bier-Kultur-Rais, mit zig verschidene Bier, jedes im aigene schpezielle Glas en ächte Kulturschogg.

Mir fraie uns uff jede Fall scho wider uf dr näggscht Dambourebummel
Thomas und Rolf

16_manneken_pis